Tags-Shahr

khiḌkiyāñ huiiñ ḳhālī phūloñ aur charāġhoñ se
kaisā dil taḌaptā hai shahr se guzarne meñ

jā basī hai vo laḌkī shahr meñ magar ab bhī
gūñjte haiñ giit us ke har pahāḌī jharne meñ

gum-shuda shahr meñ DhūñDhtā huuñ kise
ek ik shakl ko yaad kartā huā

shāyad ḳhabar nahīñ hai ġhazālān-e-shahr ko
ab ham ne jañgaloñ kā safar band kar diyā

'anvar-shu.ūr' din meñ kahīñ raat meñ kahīñ
rahtā hai ḳhvār shahr-e-ḳharābāt meñ kahīñ

kyā aur koī shahar meñ miltā nahīñ use
aa aa ke roz ishq hamāre gale paḌe

mirī dastaras meñ hai gar qalam mujhe husn-e-fikr-o-ḳhayāl de
mujhe shahryār-e-suḳhan banā aur enān-e-shahr-e-kamāl de

kalīm-e-vaqt ke dar ko jabīñ tarastī hai
amīr-e-shahr ke bekal sujūd meñ na rakh

ābādiyoñ ke huzn meñ sahrā ke shahr meñ
bastī na.ī basā ke nazārā kareñge ham

sunā hai shahr-e-ḳhamoshāñ meñ aa gayā huuñ maiñ
yahīñ kahīñ koī merā makān bhī hogā

musāhiboñ meñ ghire hoñge zill-e-sub.hānī
ġhanīm shahr ko tārāj kar rahā hogā

tum shahr jā rahe ho to jaao magar vahāñ
armāñ mileñge dekhnā behad niDhāl se

sadiyoñ se kināre pe khaḌā suukh rahā hai
is shahr ko dariyā meñ girā denā chāhiye

shahr kī miTTī pukāre hai 'shabāb'
ho chukā ban-bās puurā ghar chalo

galiyoñ kī sham.eñ bujh ga.iiñ aur shahr suunā ho gayā
bijlī kā khambā thaam kar bāñkā sipāhī so gayā

nafratoñ ke tiir khā kar dostoñ ke shahr meñ
ham ne kis kis ko pukārā ye kahānī phir sahī

ek diye kī lau ne saarā shahr jalā kar ḳhaak kiyā
ek havā kā jhoñkā ban kar āñdhī aur tūfān huā

daad be-dād tujh sitam suuñ hai
bas-ki shahr-e-husn meñ qaazī na.iiñ

jañgaloñ se shahr tak shāna-ba-shāna pusht pusht
silsila kartī huī vo sar-guzasht apnī hī thī

merī ḳhush-taba.ī na thī rū-e-ġharīb-e-shahr haañ
shahar-yāroñ meñ muzavvaj ḳhū-e-zasht apnī hī thī