Tags-Shahr

sun kar ki 'hosh' ne bhī kiyā tark-e-ārzū
kohrām ik machā huā shahr-e-vafā meñ hai

kam ulajhtī hai charāġhoñ se havā mere ba.ad
shahr meñ shahr kā mausam na rahā mere ba.ad

kyā burā vaqt paḌā shahr-e-vafā par 'mahshar'
mujh ko hī DhūñDtī hai merī vafā mere ba.ad

paañv meñ ḳhaak hī zanjīr-e-girāñ hai ki nahīñ
pūchhnā log jab is shahr se jaane lag jaa.eñ

dhuup utrī hai na rāhoñ meñ ghanā saaya hai
ab tire ba.ad tire shahr meñ kyā rakhā hai

maqtal-e-shahr meñ sar haiñ ki salīboñ ke hujūm
ḳhuuñ kā dariyā hai ki tā-hadd-e-nazar Thahrā hai

amīr-e-shahr tanavvo-pasand hai 'ḳhālid'
libās-e-nau ke mutābiq zabāñ badaltā hai

kaun jaane ḳhair kā pahlū kahīñ raushan ho shāyad
ham tumhāre shahr meñ haiñ be-amāñ hote hue bhī

ḳhush-gumāñ haiñ TuuTe phūTe log bhī is shahr meñ
kaun hai vo jo dabā ḳhud apne malbe meñ nahīñ

jaane 'fārūq' vo kyā shahr thā jis ke andar
ek Dar thā ki makīnoñ meñ makīñ rahtā thā

ajiib bhiiḌ yahāñ jam.a hai yahāñ se nikal
kahīñ bhī chal magar is shahr-e-be-amāñ se nikal

ye shikāyat-e-dar-o-bām kyā ye rabāt-e-kohna kī raat kyā
koī be-charāġh shab-e-vafā tire shahr meñ bhī guzar ga.ī

vo ġharīb-e-shahr kahe bhī kyā jo tirī zabāñ se hai be-ḳhabar
magar ek rāh-e-suḳhan bhī hai ki ye zindagī hai jidhar ga.ī

yuuñ tire shahr meñ badlī hai havā-e-ḳhush-rañg
jitne ma.asūm haiñ chālāk huā chāhte haiñ

sab ko rahtī hai yahāñ shahr-e-amāñ kī ḳhvāhish
itne hālāt ḳhatarnāk huā chāhte haiñ

ik junūñ thā ki ābād ho shahr-e-jāñ aur ābād jab shahr-e-jāñ ho gayā
haiñ ye sargoshiyāñ dar-ba-dar kū-ba-kū tum kahāñ jāoge ham kahāñ jā.eñge

taqdīr meñ thī furqat-e-yārān-e-lucknow
is shahr meñ 'munīr' kahāñ thā kahāñ basant

naqsha uThā ke koī nayā shahr DhūñDhiye
is shahr meñ to sab se mulāqāt ho ga.ī

is shahr meñ aatā hai nazar har koī apnā
āvāz kise duuñ mujhe rahtī hai yahī soch

koī apne ghar se nikaltā nahīñ
ajab haal hai aaj kal shahr kā