Tags-Shahr

jab dahr ke ġham se amaañ na milī ham logoñ ne ishq ījād kiyā
kabhī shahr-e-butāñ meñ ḳharāb phire kabhī dasht-e-junūñ ābād kiyā

ik na.e shahr-e-ḳhush-āsār kī bīmārī hai
dasht meñ bhī dar-o-dīvār kī bīmārī hai

shah-e-jamāl tire shahr ke faqīroñ ko
kamāl-e-hijr ne vahshat se bāñdh rakkhā hai

sab ke hamrāh sab ke saa.e the
shahar meñ koī devtā na milā

raushnī ke safīr lauT ga.e
shahr-dar-shahr rat-jagā na milā

ik had banā rahā huuñ shahr-e-havas meñ apnī
dar kholne kī ḳhātir dīvār kar rahā huuñ

chup rahe to shahr kī hañgāma ārā.ī milī
ab agar khole to ham ko qaid-e-tanhā.ī milī

yahāñ ik shahar thā shahr-e-nigārāñ
na chhoḌī vaqt ne is kī nishānī

kahīñ manzil se bhaTak jaa.e na dīvāna-e-gul
jāda-e-shahr-e-bahārāñ meñ bichhā do kāñTe

kitne pāgal haiñ mere shahr ke log
bāñjh mausam meñ phal talāsh kareñ

kāġhzī shahr uḌe jaate haiñ vo
āsmānoñ kī rifāqat hī sahī

shurūa ho chukī hai jañg shahr meñ
mohabbatoñ ko darmiyān chhoḌ de

shīsha-e-jāñ ko bachāne kī ye koshish 'tanvīr'
shāyad is shahr-e-sitam ke liye bekār bhī ho

haiñ sabhī log shahr ke achchhe
ham se baḌh kar koī burā na huā

saarī chābiyāñ mere havāle kiiñ aur us ne itnā kahā
āThoñ pahar hifāzat karnā shahr hai nau darvāzoñ kā

haath aayā nahīñ kuchh sañg-e-malāmat ke sivā
shahr meñ dekh liyā ham ne tamāshā ban kar

be-shajar shahr meñ ghar us kā kahāñ tak DhūñDeñ
vo jo kahtā thā ki āñgan meñ sanobar hogā

ek añgḌā.ī se saare shahr ko niiñd aa ga.ī
ye tamāshā maiñ ne dekhā baam par hotā huā

nikle agar to chāñd darīche meñ ruk bhī jaa.e
is shahr-e-be-charāġh meñ kis kā nasīb thā

kitne lahjoñ ke ġhilāfoñ meñ chhupā.ūñ tujh ko
shahr vaale mirā mauzū-e-suḳhan jānte haiñ