Tags-Shahr

shahr kī sarhad talak pahuñchā ke sab ruḳhsat hue
ab yahāñ se bas mire ham-rāh sahrā jā.egā

zinda koī kahāñ thā ki sadqa utārtā
āḳhir tamām shahr hī ḳhāshāk ho gayā

tum apne qasboñ meñ jā ke dekho vahāñ bhī ab shahr hī base haiñ
ki DhūñDhte ho jo zindagī tum vo zindagī ab kahīñ nahīñ hai

tamām shahr meñ puurī tarah ḳhamoshī thī
mujhe paḌī thī koī giit gungunāne kī

udaas shahr meñ zinda-dilī kī qīmat kyā
bajā hai merī hañsī kā ġhubār ho jaanā

'nayyar' ko le chalī thī jo shahr-e-ġhurūr meñ
ham ne vo rahguzār-e-ḳhurāfāt kaaT dī

har ek raah hai sunsān har galī ḳhāmosh
ye shahr shahr-e-ḳhamoshāñ hai koī bole kyā

dukh na sahne kī sazāoñ meñ ghirā rahtā hai
shahr kā shahr duāoñ meñ ghirā rahtā hai

Dar gayā shahar ke makānoñ se
vaqt se pahle Dhal gayā sūraj

ab chalo
yahāñ se āsmān tak tamām shahr chādareñ lapeT lī ga.iiñ

dikhā.ī kis tarah de shahr meñ koī mujhe āḳhir
sivā us ke nazar meñ ab koī manzar nahīñ rahtā

kar diyā hai mast saare ḳhuftagān-e-ḳhāk ko
kyā huā shahr-e-ḳhamoshāñ kī nashāt-añgez hai

ye dhaḌaktā huā dil us ke havāle kar duuñ
ek bhī shaḳhs agar shahr meñ zinda mil jaa.e

kyā nahīñ jāntā mujhe koī
kyā nahīñ shahr meñ vo ghar baaqī

is shahr meñ jiine kī adā siikh rahī huuñ
biite hue kal par ye guzārā nahīñ kartā

anjān shahr meñ thā akelā nikal paḌā
'zīshān' tujh ko zehn meñ rakhnī thī har galī

jaane us ne kyā dekhā shahr ke manāre meñ
phir se ho gayā shāmil zindagī ke dhāre meñ

nā-karda gunāhoñ kī sazā paa.ī hai 'nusrat'
insāf huā shahr meñ rusvā mere aage

chāra-e-ġham ke liye shart hai iḳhlās 'nasīr'
kaun hai shahr meñ aisā jise zahmat dī jaa.e

is shahr ko raas aa.ī ham jaisoñ kī gum-nāmī
ham naam batāte to ye shahr bhī jal jaatā