Tags-Shahr

afvāh kis ne aisī uḌaa.ī ki shahr meñ
har shaḳhs bach rahā hai na us se nazar mile

kabhī shahr shahr ḳhirad phirī kabhī dasht dasht junūñ gayā
mirī zindagī mujhe kuchh batā tujhe kyā milā mujhe kyā milā

maiñ chalā thā shahr kī raah se magar apnī zaat meñ gum huā
mujhe 'bāqar' apnī talāsh thī mujhe aaj apnā patā milā

har ek pūchhtā phirtā hai phir na kuchh ta.abīr
ki jaise shahr meñ melā thā raat ḳhvāboñ kā

kyā kyā na hameñ ghar kī udāsī se gila thā
ab shahr se nikle haiñ to hairān khaḌe haiñ

yādoñ ke ghane shahr meñ kyūñkar koī nikle
har fard ke pīchhe ka.ī afrād khaḌe haiñ

phir shahr-e-ġhazālāñ meñ ġhazal laayā hai 'qaisar'
sūrat-kada-e-husn meñ phir dhuum paḌī hai

itne bhī tahī-dast ta.alluq nahīñ 'ālī'
is shahr meñ kuchh apne bhī mashrab ke thaḌe haiñ

shahr-dar-shahr fazāoñ meñ dhuāñ hai ab ke
kis se kahiye ki qayāmat kā samāñ hai ab ke

shahr se ishq kartā huuñ maiñ 'azīz'
dasht meñ kyuuñ basāyā jā.uñgā

kab ban-bās kaTe is shahar ke logoñ kā
qufl khuleñ kab jaane band makānoñ ke

hujūm-e-shahr ki jis kī mulāzmat meñ huuñ maiñ
mire liye mirī tanhā.ī kā idāra banā

is shahr ko faqīr kī jab bad-duā lagī
bārish huī na phir koī manzar harā huā

tere qāmat meñ hai insāñ kī bulandī kā vaqār
duḳhatar-e-shahr hai, tahzīb kā shahkār hai tū

dekhtā huuñ maiñ vāqi.āt silsila-e-taġhayyurāt
sadiyoñ se vast meñ banā shahr kā rāsta huuñ maiñ

lipaT rahī hai fasīl kī burjiyoñ se ik shahr kī nigāheñ
aur ek dīvār-e-ā.īna par jhukā huā hai charāġh merā

jo saare shahr kā thā us kī ḳhātir
maiñ saare shahr se laḌtā rahā huuñ

dushmanī to mirī thī sūraj se
shahr kā shahr jal gayā mire saath

dil-e-barbād se karte haiñ jise ham ta.abīr
isī vīrāne meñ ik shahr thā armānoñ kā

ik-ādh ghar to jal gayā par shahr bach gayā
ab ke diye kā saath havā ne nahīñ diyā