Tags-Shahr

mujh ko kisī kī baat kī parvā nahīñ abhī
maiñ jī rahā huuñ shahr meñ tanhā to kyā huā

ik gard-e-masāfat thī jo chehre se na utrī
vaise to yahāñ ham ne ka.ī shahr basā.e

gire paḌe hue pattoñ meñ shahr DhūñDtā hai
ajiib taur hai is jañgaloñ ke baasī kā

aur hī ek samt se aur hī ik maqām par
gard ne shahr ko chhuā phir mujhe niiñd aa ga.ī

na shahr meñ na kisī dasht-e-hū meñ ḳhaak hue
hamāre ḳhvāb hamāre lahū meñ ḳhaak hue

sahmā sahmā har ik chehra manzar manzar ḳhuun meñ tar
shahr se jañgal hī achchhā hai chal chiḌiyā tū apne ghar

hairat se sab ko takte haiñ patthar bane hue
jādūgaroñ ke shahr meñ apnā nivās hai

kahāñ haiñ shahr ke be-fikr bachche
masarrat ke ḳhazāne kyā hue sab

apnā shīsha liye kahāñ jā.ūñ
shahr kā shahr saarā patthar hai

agarche 'farhat-ehsās' apnā majnūñ shahr vaalā hai
par us ke ishq ke andāz sab vīrāne vaale haiñ

yahīñ kahīñ pe koī shahr bas rahā thā abhī
talāsh kījiye is kā agar nishāñ koī hai

maiñ us ke saath huuñ jo uTh ke phir khaḌā ho jaa.e
maiñ tere shahar ko ab zalzala nahīñ dūñgā

bāzār tire shahr ke badnām bahut haiñ
chhoTī sī ḳhushī ke bhī yahāñ daam bahut haiñ

ye shahr bhī mahfūz nahīñ qahr-e-ḳhudā se
saaqī bhī haiñ mai-ḳhāne bhī haiñ jaam bahut haiñ

ye usī shahr ke manāre haiñ
ai tahayyur-sarisht bīnā.ī!

kahīñ surāġh nahīñ hai kisī bhī qātil kā
lahūluhān magar shahr kā nazāra hai

shahr kā shahr basā hai mujh meñ
ek sahrā bhī sajā hai mujh meñ

shahr-e-bedād meñ hubb-ul-vatanī
ik munāfiq kī vafā ho jaise

dasht meñ to ek ham the aur kuchh na thā
shahar ke hujūm meñ bhī kho na paa.e ham

shahr-e-qāzī tire fatvoñ se ġharaz kyā mujh ko
rab mirā dil mirā marzī mirī maz.hab merā