Tags-Shahr

raat petrol kī aag se shahr meñ yuuñ charāġhāñ huā
kaañp kar bujh ga.iiñ dil ke raushan jharokoñ kī sab battiyāñ

dekhnā ye hai Thahartā hai kahāñ josh-e-junūñ
sar-phire shahr-e-nigārāñ ko jalāne nikle

har taraf shahr meñ vīrānī kā aalam hai 'razā'
zindagī kaun kahāñ tujh ko sajāne nikle

kar diyā dhuup ne jab shahr ko sāyoñ ke sipurd
phir to din meñ bhī ka.ī raat ke manzar aa.e

laḌkhaḌātī havā roz kahtī hai kyā shahr vaalo suno
ek paudā koī aaj phir jal gayā shahr vaalo suno

aa ga.e ret ke Dher dīvār tak balki bāzār tak
dasht ke haath likh deñ na phir faisla shahr vaalo suno

kyā sitam-ḳhez ujāloñ se achchhe hamāre añdhere nahīñ
jañgaloñ ne tumheñ kyā nahīñ kah diyā shahr vaalo suno

koī tum meñ yazīd aur shabbīr hai kis kī taqsīr hai
log kahne lage shahr ko karbalā shahr vaalo suno

ḳhaak muñh meñ mire ham pe kyā koī taaza balā aa.egī
ro rahā hai bahut din se koh-e-nidā shahr vaalo suno

phuul ban kar khilo koī ḳhushbū bano kuchh mudāvā karo
kah rahī hai falak nā-rasīda duā shahr vaalo suno

dhuāñ dhuāñ sī hai khetoñ kī chāñdnī 'bāqī'
ki aag shahr kī ab aa ga.ī hai gaañv meñ

tamām shahr ke chehroñ ko paḌhne niklā huuñ
ai mere dost mire haath meñ kitāb na de

bahut hī būḌhā sahī par isī shajar se ghar
tamām shahr meñ ik ān-bān rakhtā hai

tark sabzān-e-shahar kariye ab
bas bahut kar chuke nihāl hameñ

dil lagāyā hai to nafrat bhī nahīñ kar sakte
ab tire shahr se hijrat bhī nahīñ kar sakte

thī titliyoñ ke ta.āqub meñ zindagī merī
vo shahr kyā huā jis kī thī har galī merī

rañg-e-rusvā.ī sahī shahr kī dīvāroñ par
naam 'rāshid' kā ubharnā to abhī baaqī hai

maiñ miTTī se bane murda badan ko le ke phirtā huuñ
magar is shahr meñ 'ansar' dam-e-īsā nahīñ miltā

kis tarah kho.e ga.e aks-e-ravāñ kī sūrat
shahr-e-hairāñ meñ tirā khoj lagāne vaale

din nikalte haiñ bikhar jaate haiñ
shahr baste haiñ ujaḌ jaate haiñ