Tags-Shahr

jaise har ek dar pe ḳhamoshī kā qufl ho
ab gūñjtī hai shahr meñ zanjīr-e-dar kahāñ

vo apne shahr-e-farāġhat se kam nikaltā hai
nikal bhī aa.e to fursat se kam nikaltā hai

in ābloñ kī raushnī bhaTkegī shahr meñ
ai kūcha-gard gardish-e-pā ko sameT le

adū-e-shahr maiñ bārūd huuñ mohabbat kā
hadoñ se baat baḌhegī to phaT bhī saktā huuñ

ham vahāñ kyā nigah-e-shauq ko sharminda kareñ
shahr kā shahr jahāñ us kā tamāshā.ī ho

tamām shahr ko us kā pata milā mujh se
vo aa.ine meñ thā par aa.ine se bāhar thā

lafzoñ ke sitam lahjoñ ke āzār bahut haiñ
kahne ko to is shahr meñ ġham-ḳhvār bahut haiñ

har samt sapere haiñ jamā.e hue Dere
is shahr meñ sāñpoñ ke ḳharīdār bahut haiñ

ik ham hī nahīñ shahr-e-sitam-sāz meñ 'ātif'
be-jurm sazāoñ ke sazā-vār bahut haiñ

aisī hī be-chehragī chhā.ī huī hai shahr meñ
āp-apnā aks huuñ maiñ aap ā.īna huuñ maiñ

hameñ ḳhabar thī shahr-e-panah par khaḌī sipāh munāfiq hai
hameñ yaqīñ thā naqab-zanoñ se ye dasta mil jā.egā

ḳhud-dārī bhī kachchā shīsha fankārī bhī kachchī niiñd
sab kuchh kho kar ye paayā hai shahr-e-hunar meñ kuchh bhī nahīñ

tamām shahr meñ bikhrā paḌā hai merā vajūd
koī batā.e bhalā kis tarah chunūñ ḳhud ko

shahr kā bhī dastūr vahī jañgal vaalā
khojne vaale hī akasr kho jaate haiñ

shajar kalām kareñ shahr bhī nayā ho jaa.e
maiñ ek ism paḌhūñ aur mo.ajiza ho jaa.e

shahr ko ātish-e-ranjish ke dhuāñ tak dekhūñ
maqtal ziist ko āḳhir maiñ kahāñ tak dekhūñ

maiñ to pahlī baar aayā thā tumhāre shahr meñ
nā-gahāñ mujh ko lagā shahr-e-gumāñ dekhā huā

mirā bhī dil nahīñ lagtā ghane makānoñ meñ
use bhī shahr kī āb-o-havā qubūl nahīñ

tamām shahr kī āñkhoñ meñ reza reza huuñ
kisī bhī aañkh se uThtā nahīñ mukammal maiñ

ab kahīñ shahr meñ 'āsim' hai na 'ġhālib' koī
kis ke ghar jaa.e ye sailāb-e-balā dekhte haiñ