Tags-Shahr

ḳhulūs-e-fan hī to 'nādir' kā hai ki shāmil hai
ab us kā naam bhī shahr-e-suḳhan ke mīroñ meñ

is liye mujh ko amīr-e-shahr ne dī hai sazā
maiñ ne ḳhud ko ḳhādim-e-sibt-e-payambar kah diyā

ḳhvāb tābīr kā hissa hai to so kar dekheñ
sach ke idrāk meñ ik shahr-e-gumāñ aur sahī

shahr tū apne gande paañv pasāre dariyā ke kināre leTā hai
aur tere siine par reñgtī huī chyūñTiyāñ sūraj ko ghuur rahī haiñ

shahr maiñ terī dīvāna-kun ḳhvāhishoñ se be-zār huuñ
shahr tū apne gande libās kab utāregā

muḌ ke dekhā thā to saarā shahar patthar ho gayā
lauT kar aa.e to har patthar se Takrāte haiñ ham

yā rab tirī rahmat kā talabgār hai ye bhī
thoḌī sī mire shahr ko bhī āb-o-havā de

na.e kapḌe badal aur baal banā tire chāhne vaale aur bhī haiñ
koī chhoḌ gayā ye shahr to kyā tire chāhne vaale aur bhī haiñ

ye kahīñ shahr-e-tasavvuf to nahīñ duur talak
sab ke kandhoñ pe doshāle nazar aate haiñ mujhe

hasrat-e-shahr-e-nasībāñ kyā tujhe ma.alūm bhī hai
dasht hai ābād ya.anī ishq ke ghar se ziyāda

vaqfa hai zindagī to faqat chand roz kā
phir shahr-e-rañg-o-bū kī taraf ik safar bhī hai

zarā mahfūz rastoñ se guzarnā
tumhārī shahr meñ shohrat bahut hai

hai dil meñ ghar ko shahar se sahrā meñ le chaleñ
uThvā ke āñsuoñ se dar-o-bām dosh par

paanī paanī shahr-panāh
masjid mandar sab paanī

tum ne dil-nagrī ko ujḌā huā gaañv jaanā
varna ik shahr thā is gaañv ke pīchhe pīchhe

savārī uuñT kī hai
aur maiñ shahr-e-shikasta kī

sahrā kā musāfir huuñ maiñ ma.alūm hai tujh ko
kyoñ rakhtā hai tū shahr kā naqsha mire aage

chāñdī vāle, shīshe vāle, āñkhoñ vaale shahr meñ
kho gayā ik shaḳhs mujh se, dekhe-bhāle shahr meñ

mandiroñ ke sehn meñ sadiyoñ purānī ghanTiyāñ
deviyoñ ke husn ke kohna havāle shahr meñ

sard rātoñ kī havā meñ uḌte pattoñ ke masīl
kaun tere shab-navardoñ ko sambhāle shahr meñ