Tags-Shahr

pighlī kuchh aur barf to ik aur shahr-e-ḳhvāb
yuuñ bah gayā nasheb meñ goyā kabhī na thā

be-basārat shahr meñ be-chehragī ke darmiyāñ
ik diyā jaltā huā ik ā.īna merā bhī hai

tumheñ merī zarūrat bhī paḌegī
purāne shahr kā naqsha hai mujh meñ

farāz-e-dār se apnoñ ke chehre ḳhud hī pahchāne
faqīh-e-shahr ko jaanā nahīñ hai mo'tabar maiñ ne

tamām-shahr ne chehre badal liye shāyad
taras ga.e haiñ koī āshnā dikhā.ī de

shahr-e-māyūsī meñ ik chhoTī sī ummīd-e-visāl
ajnabī kī shakl meñ phirtī hai ghabrā.ī huī

ik shahr-e-ārzū pe bhī honā paḌā ḳhajil
hal-mimmazīd kahtī hai rahmat duā ke ba.ad

pahle to shahr meñ itne raste na the itnī galiyāñ na thiiñ moḌ itne na the
ham akele khaḌe haiñ pareshān haiñ aur aage baḌhe to kidhar jā.eñge

aur bhī ahl-e-nazar haiñ kabhī dekho to sahī
ham bhī is shahar meñ ai kam-nazrāñ rahte haiñ

vus.at-e-dasht nahīñ raas chaman-zādoñ ko
ham tire shahar kī jānib nigarāñ rahte haiñ

amīr-e-shahr ne ham ko sagān-e-shahr samjhā hai
vo apnā kaam rokegā na apnā Dhañg badlegā

guzar jā.eñge ham dār-e-fanā se 'baḳhsh' lekin
hamāre shahr kī tāsīr rahne ke liye hai

gāñv-numā ghar shahr meñ laakh banāyā lekin
āñgan dar mehrāb kī ab bhī gunjā.ish hai

āshiqī kī ḳhair ho 'sarvar' ki ab is shahr meñ
vaqt vo aayā hai bande bhī ḳhudā hone lage

ye shahr-e-sañg hai shahr-e-vafā nahīñ hai ye
agar nikalnā hai hosh-o-havās se niklo

khet meñ jo chug rahī thī qaid meñ ghabrā ga.ī
gaañv kī mainā jo aa.ī shahr meñ dubrā ga.ī

is shahr ke bādal tirī zulfoñ kī tarah haiñ
ye aag lagāte haiñ bujhāne nahīñ aate

shahr kī galiyoñ aur saḌkoñ par phirte haiñ māyūsī meñ
kaash koī 'anvar' se pūchhe aise be-ghar kitne haiñ

ham bhī is shahr kī vīrān sī raunaq meñ kahāñ
apne mānūs ḳharāboñ se nikal aa.e haiñ

tumhāre husn ke tufail ḳhizr-e-shahr-e-raz ko bhī
'salām' aise shā.iroñ kī kaj-ravī qubūl ho