Tags-Shahr

shahr vīrān ho gayā 'asġhar'
sansanātī huī havā se Dar

mujh ko apne shahar kā har ek zarra hai aziiz
ai havā le jā uḌā kar ḳhaak merī kū-ba-kū

sar bhī maujūd haiñ shamshīr-e-sitam bhī maujūd
shahr meñ ḳhuun kā sailāb nahīñ dekhte haiñ

aa ga.e haiñ ye mire shahr meñ kis shahr ke log
guftugū meñ adab-ādāb nahīñ dekhte haiñ

'falak' maiñ sar-zamīn-e-'dāġh'-o-'ġhālib' kā huuñ ik zarra
vatan hai shahr-e-dehlī zindagī urdu zabāñ merī

chehre pe saare shahr ke gard-e-malāl hai
jo dil kā haal hai vahī dillī kā haal hai

is shahr meñ kahīñ pe hamārā makāñ bhī ho
bāzār hai to ham pe kabhī mehrbāñ bhī ho

kaun sī shai mujh ko pahuñchā.egī tere shahr tak
ye patā to tab chalegā jab patā le jā.ūñgā

charāġh-pā hai mirī niiñd in dinoñ mujh se
maiñ koī shahr basāne lagā thā ḳhvāboñ kā

be-libāsī mirī tauqīr kā baa.is Thahrī
bol-bālā hai bahut shahar meñ uryānī kā

shahr meñ yaum-e-aman hai vaa.iz
aaj tirī taqrīr nahīñ hai

shahr mohabbat kā yuuñ ujḌā
duur talak tāmīr nahīñ hai

gandum aur gulāboñ jaise ḳhvāb shikasta karte
dūr-darāz zamīnoñ vaale shahr meñ dar aate haiñ

ahd-e-sitam hai dekheñ ham āshufta-saroñ pe kyā guzre
shahr meñ us ke band-e-qabā kī rañg-e-hinā kī baat chalī

aise-vaise hue is shahr meñ kaise kaise
ahl-e-dastār kī hai ham ko najābat ma.alūm

kaañp uTThā huuñ varūd-e-bārish-e-mau.ūda par
ġharq hone ko hai saarā shahar sail-e-āb meñ

maanā ki shahr-e-husn meñ jins-e-vafā nahīñ
lekin jahāñ meñ ishq kī daulat ko kyā huā

mujhe dilātī haiñ jañgal meñ hone kā ehsās
ye shahr vāloñ kī ayyār-o-hoshiyār āñkheñ

be-sar-o-sāmāñ kuchh apnī tab.a se haiñ ghar meñ ham
shahr kahte haiñ jise haiñ us ke pas-manzar meñ ham

jo nazar bachā ke guzar ga.e mire sāmne se abhī abhī
ye mire hī shahr ke log the mire ghar se ghar hai milā huā