Tags-Shahr

shor yūñhī na parindoñ ne machāyā hogā
koī jañgal kī taraf shahr se aayā hogā

husn-e-takmīl-e-tamannā hai sabā ho jaanā
shahr-dar-shahr har ik dil kī ravā ho jaanā

nahīñ hai shahr-e-vafā kī tabāhiyoñ kā gilā
magar vo log jo rahte the in makānoñ meñ

baal apne baḌhāte haiñ kis vāste dīvāne
kyā shahr-e-mohabbat meñ hajjām nahīñ hotā

hujūm-e-shahr meñ har aadmī akelā hai
yahāñ kisī ko kisī kī vafā na raas aa.ī

patthar ke jism mom ke chehre dhuāñ dhuāñ
kis shahr meñ uḌā ke havā le ga.ī mujhe

jo log be-vaqār se phirte the shahr meñ
mere sabab se un ko bhī tauqīr mil ga.ī

hañs ke milo har ek se jis haal meñ milo
is shahr kā rivāj hai ai ham-shabīh-e-man

dekhā hai koī ḳhvāb azīzān-e-shahr ne
kai saal kā anaaj hai ai ham-shabīh-e-man

muqām-e-be-ḳhabarī hai yahāñ se kitnī duur
ki shahr-e-dil meñ baḌā shor shahryār kā hai

nāzil huā thā shahr meñ kaalā azaab ek
ġhārat-gar-e-nasīb thā ḳhāna-ḳharāb ek

shahr-e-ġhazal meñ jauhar-e-nāyāb fan 'alīm'
haiñ saiñkaḌoñ janāb meñ ālī-janāb ek

ye shahr hai shahr-e-zardārī kyā hogā 'shamīm' anjām tirā
yaañ zehn ḳharīdā jaatā hai yaañ ahl-e-qalam bik jaate haiñ

ai shahr-e-anā tere fareboñ ke bharam meñ
ā.īna-misāloñ kī ho tahqīr kahāñ tak

naam pe maz.hab ke jamghaT hai logoñ kā
shahr meñ shāyad dañgā hone vaalā hai

tujh se bichhḌe gaañv chhoTā shahr meñ aakar base
taj diye sab sañgī-sāthī tyaag Daalā des bhī

kabhī mulk-e-halab meñ huuñ kabhī shahr-e-ḳhutan meñ huuñ
nahīñ rahtā tirī shohrat kī sūrat ek sū ho kar

shahr se kyuuñ kareñ vo azm-e-safar
ham-nashīñ tū ne kyā uḌaa.ī baat

tamām-shahr to ḳhushbū se us kī vāqif hai
koī to mujh ko batātā yahāñ vo aayā kab

ai zindagī ai zindagī kuchh raushnī kuchh raushnī
chalā rahā thā shahr meñ muddat se dīvāna tirā