Tags-Shahr

vo shahr-e-ḳhvāb se guzrā to daf.atan mujh ko
haqīqatoñ ke badalne kā ehtimāl huā

ham to sahrā hue jaate the ki us ne aa kar
shahr ābād kiyā nahr-e-sabā jaarī kī

kis mashaqqat se mujhe jism uThānā paḌā hai
shaam hote hī tire shahr se jaanā paḌā hai

ḳhuub hai shahr-e-amāñ terā yahāñ bhī ai jaañ
jis se ham bach ke chale the vo ḳhatar sāmne hai

ab bhī hai duurī kā ehsās ki shal haiñ paañv
yuuñ to maiñ shahar meñ huuñ aap kā ghar sāmne hai

shahr se yaar savār huā jo savād meñ ḳhuub ġhubār hai aaj
dashtī vahsh o tair us ke sar tezī hī meñ shikār hai aaj

tumhāre shahr kā mausam baḌā suhānā lage
maiñ ek shaam churā luuñ agar burā na lage

the ba-faiz-e-ishq ham bhī yūsuf-e-bāzār-e-misr
lauT kar jaate kahāñ shahr-e-zuleḳhā dekh kar

maiñ huuñ is shahr meñ tāḳhīr se aayā huā shaḳhs
mujh ko ik aur zamāne meñ baḌī der lagī

ahd-e-kam-koshī meñ ye bhī hausla maiñ ne kiyā
shahr ke sab band darvāzoñ ko vā maiñ ne kiyā

maiñ ne saf-ārā kiyā ik majma-e-shorīda-sar
kaj-kulāh-e-shahr ko be-mājrā maiñ ne kiyā

hai is meñ qaid-e-shahr na vīrāna chāhiye
bahr-e-farāġh tab-e-faqīrāna chāhiye

dekho tum apne kachche dar-o-dīvār ko pakkā mat karvānā
shahr meñ jab bhī ā.eñge ham to tumhāre ghar hī qayām kareñge

dīvāne itne jam.a hue shahr ban gayā
jañgal ke haq meñ josh-e-junūñ zahr ban gayā

sadā.eñ de ke bulātī hai shāh-bānu-e-shahr
faqīr jis ke haiñ dekheñ vo kab pukārtī hai

mujh ko bekār meñ hairat ne pakaḌ rakkhā hai
shahr to dasht meñ tāmīr kiyā jā.egā

tum bhī har shab diyā jalā kar palkoñ kī dahlīz pe rakhnā
maiñ bhī roz ik ḳhvāb tumhāre shahr kī jānib bhejūñgā

karb ke shahr se nikle to ye manzar dekhā
ham ko logoñ ne bulāyā hameñ chhū kar dekhā

baḌā shahr baḌā shahr, baḌā shahar baḌā shahr
kisī ke liye tū bā.is-e-tamāniyat

baḌe ḳhulūs se ik shahr-e-gul ujaaḌ liyā
huī haiñ ahl-e-nazar se himāqateñ kyā kyā