Tags-Shahr

log mujh ko mire āhañg se pahchān ga.e
kaun badnām rahā shahr-e-suḳhan meñ aisā

musāfiroñ ke liye to yaksāñ hai dasht aur shahr se guzarnā
ki shaam hote hī taan lete haiñ log ḳhvāboñ ke shāmiyāne

gardish-e-vaqt tham ga.ī 'ādil'
tum jo shahr-e-misāl se guzre

siine meñ jalan āñkhoñ meñ tūfān sā kyuuñ hai
is shahr meñ har shaḳhs pareshān sā kyuuñ hai

shahr-e-nigārāñ meñ phirte haiñ ham āvāra raat Dhale
shāyad koī darīcha vā ho shāyad koī diip jale

sañg-e-malāmat se bach jaa.e to jāneñ
'tūr' is shahr-e-munāfiq meñ zarā bāhar aa

shahr par raat kā shabāb utre
mujh pe tanhā.ī kā azaab utre

shahr bahrā hai log patthar haiñ
ab ke kis taur inqalāb utre

dil yahī chāhtā thā 'shanāvar' sitāroñ kā muñh noch luuñ!
shahr ko maiñ ne dekhā thā ik raat masjid ke mīnār se

rasm hī shahr-e-tamannā se vafā kī uTh jaa.e
is tarah to na koī ahl-e-mohabbat ko satā.e

ab to dīvār pe likkhe haiñ ka.ī naam na.e
is hasīñ shahr kī rūdād hue the ham bhī

DhūñDne nikle the jam.īyat-e-ḳhātir lekin
shahr kā shahr pareshāñ hai ye ma.alūm huā

ye soch ke aayā hai tire shahr meñ 'anjum'
ā.īnoñ ke is shahr meñ patthar na milegā

yaad hai kyā kaam hai is shahr kā kyā naam hai
sab kuchh us jaisā hai lekin āsmāñ dhānī nahīñ

mujhe gilās ke andar hī qaid rakh varna
maiñ saare shahr kā paanī sharāb kar dūñgā

shahr meñ jurm-o-havādis is qadar haiñ āj-kal
ab to ghar meñ baiTh kar bhī log ghabrāne lage

yuuñ ḳhush na ho ai shahr-e-nigārāñ ke dar o baam
ye vādi-e-saffāk bhī rahne kī nahīñ hai

'barq'-sāhab ne na dekhā tujhe ai barq-jamāl
shahr meñ jā ke tire husn kā charchā karte

mere siine meñ munavvar hue yādoñ ke charāġh
bazm-e-ḳhūbāñ kī tarah shahr-e-nigārāñ kī tarah

na nasīm-e-bāġh-o-bahār huuñ na fidā-e-rū-e-nigār huuñ
maiñ ġharīb-e-shahr-o-dayār huuñ mirī dair o ka.aba meñ jā nahīñ