Tags-Shahr

ye munsifān-e-shahr haiñ ye pāsbān-e-shahr
in ko batāo naam jo balvā.iyoñ ke haiñ

jo chāhte haiñ kisī ko yahāñ na aane deñ
batāo shahr-e-talab meñ hisār kaisā hai

pichhḌe hue gaañv kā shāyad hai vo bāshinda
jo shahr meñ DhūñDe hai īsār kī gunjā.ish

jo milā nazreñ churā kar chal diyā ab kyā kaheñ
shahr meñ rah kar kabhī itnī shanāsā.ī na ho

shahr meñ jā ke kahūñ kis se burā haal apnā
koī apnā ho to ahvāl sunā.ūñ us ko

'sābir' in mānūs galiyoñ se to dil uktā gayā
aa chaleñ is shahr meñ pahle jaise dekhā na ho

kaun se ġhaar meñ gir jaatā hai manzar saarā
kin ḳhalījoñ meñ bharā-shahr utar jaatā hai

sabhī se fāsla rakhne kī aadat thī so ab bhī hai
parāyā kaun thā jo shahr meñ apnā nikal aayā

ho ga.ī aam mohabbat kī kahānī kitnī
ḳhaak logoñ ne tire shahr kī chhānī kitnī

us pe kyā biitī hai apne shahr meñ
āshnā nā-āshnā rone lagā

us ke va.adoñ pe bhī kar leñge bharosa vo agar
shahr-e-kūfa ke mazāfāt se bāhar nikle

pukārā qāsid-e-ashk aaj fauj-e-ġham ke hāthoñ se
huā tārāj pahle shahr-e-jāñ dil kā nagar pīchhe

shahr meñ chāk-garebāñ hue nāpaid ab ke
koī kartā hī nahīñ zabt kī tākīd ab ke

chaurāhoñ kā to husn baḌhā shahr ke magar
jo log nāmvar the vo patthar ke ho ga.e

zaḳhm ab dil ke chamak dete haiñ hīroñ kī tarah
ham tire shahr meñ rahte haiñ amīroñ kī tarah

qadġhan lagā na ashkoñ pe yādoñ ke shahr meñ
hogā agar tamāshā to ḳhilqat bhī aa.egī

'pāshī' vo dil kā shahr ho dasht ho yā vo bahr ho
raushan nahīñ koī jagah un ke jamāl ke baġhair

dhyān kā shahr to khone kā nahīñ
aao is shahar meñ khoyā jaa.e

ye shahr saarā to raushnī meñ khilā paḌā hai so kyā likhūñ maiñ
vo duur jañgal kī jhoñpaḌī meñ jo ik diyā hai vo shā.irī hai

fasīl-e-shahr meñ rukne kī hī nahīñ ye ḳhabar
jo kaam ham se na hogā ġhubār kar legā