Tags-Shahr

jo tere naam se mansūb merā naam huā
to shahr bhar ko adāvat bhī merī jaañ se huī

is shahar-e-taġhāful meñ ham kis ko kaheñ apnā
vo shahr jo duniyā meñ kahne ko hamārā hai

aa jaate ho kyuuñ āḳhir yuuñ ḳhvāb na.e le kar
is shahr-e-tazabzub meñ kyā hai jo tumhārā hai

mirī sub.h-e-ḳhvāb ke shahr par yahī ik javāz hai jabr kā
ki mire vajūd ke baaġh meñ abhī koī phuul hai sabr kā

ham ne is shahr-e-sitamgar ke har ik zarre ko
zauq-e-sajda kī qasam sajda-gah-e-dil bāñdhā

fasīl-e-shahr pe likkhī hai dāstāñ merī
maiñ kaise baat karūñ qaid hai zabāñ merī

maiñ apne shahr meñ rah kar bhī ajnabī sā rahā
ki koī suntā nahīñ baat bhī yahāñ merī

shahr kī sotī chhateñ hoñ yā fasurda rāste
qatra qatra girtī shabnam sab kā chehra dho ga.ī

shahr gunjān ho gayā hai bahut
shahr mismār kar diyā jaa.e

fasīl-e-shahr-e-tārīkī se jaane kab rihā.ī ho
asīr-e-qariyā-e-shab haiñ mirī sīmāb-pā āñkheñ

vo ġhazal kā ruup liye hue mujhe har maqām pe le gayā
kabhī dasht-e-yār ke darmiyāñ kabhī shahr-e-fikr ke paas bhī

gumāñ kī bastī meñ rahne vaalo zarā pahāḌī pe chaḌh ke dekho
udhar nadī hai vahīñ se shahr-e-yaqīñ kā rasta nikal rahā hai

haiñ shahr bhar meñ shādiyāñ har ek shaḳhs shādmāñ
kisī ke sāmne ham apne dil ke ghaav kyā kareñ

dekhne kī tujhe kuchh dil meñ hai hasrat bhī abhī
aur ye bhī ki tire shahr meñ aa.e hue haiñ

ye barf-mausam jo shahr-e-jāñ meñ kuchh aur lamhe Thahar gayā to
lahū kā dil kī kisī galī meñ qayām mumkin nahīñ rahegā

mujh se dillī kī nahīñ dil kī kahānī suniye
shahr to ye bhī ka.ī baar luTā hai mujh meñ

band apnā dar kiyā jab ik amīr-e-shahr ne
merī ḳhātir mere maulā ke sahāre aa ga.e

shahr meñ mujh se bhaḌaktā thā tasavvur terā
us kī tasḳhīr ko maiñ sākin-e-vīrāna huā

us ko ḳhud hī maiñ ne apne shahr kī daulat sauñpī thī
kis se zikr karūñ ab jā kar us ne kyā kyā luuT liyā

amīr-e-shahr ne kāġhaz kī kashtiyāñ de kar
samundaroñ ke safar par kiyā ravāna hameñ