Tags-Shahr

chal rahī thī jab mere ghar ke jalne kī taftīsh
dekhne ke qābil thī shahr bhar kī ḳhāmoshī

jitne the rañg husn-e-bayāñ ke bigaḌ ga.e
lafzoñ ke baaġh shahar kī sūrat ujaḌ ga.e

millateñ jab jāda-e-haq se gurezāñ ho ga.iiñ
jaane kitnī bastiyāñ shahr-e-ḳhamoshāñ ho ga.ī

tū mere saath kahāñ tak chalegā mere ġhazāl
maiñ rāsta huuñ mujhe shahr se guzarnā hai

talḳh lagtā hai use shahr kī bastī kā svaad
zauq hai jis ko bayābāñ ke nikal jaane kā

vo aa.eñ uub ga.e haiñ jo dahr meñ apne
maiñ ek dasht banātā huuñ shahr meñ apne

sabhī ko baañT ke shakleñ ḳhudī rahe be-shakl
hamīñ akele musavvir the shahar meñ apne

dariyā-e-ġham meñ shahr kā har fard ġharq thā
sāhil ke ās-pās fazā mātamī sī thī

ye shahr hai yahāñ apnī hī justujū meñ log
mileñge chalte hue chiyūñTiyoñ ke dal kī tarah

apnā zāhir meñ koī jurm na thā
kyuuñ hue shahr-badar sochte haiñ

shikam kī aag liye phir rahī hai shahr-ba-shahr
sag-e-zamāna haiñ ham kyā hamārī hijrat kyā

vādi-e-gul se nikalnā ek majbūrī sahī
shahr-e-nā-pursāñ meñ ham ko rā.egāñ honā hī thā

ajnabī shahr kī galiyoñ meñ 'adā'
dil kahāñ log hī milte hoñge

us galī se chalī dard kī rau magar shahr meñ ahl-e-dil haiñ na ahl-e-nazar
jaane kis sar se guzregī ye mauj-e-ḳhūñ jaane kis ghar ye sailāb-e-ġham jā.egā

tere ġham ke charāġhoñ kī sad-rañg zau ik kiran de sakegī na ehsās ko
bazm-e-jāñ itnī sunsān ho jā.egī shahr-e-dil itnā vīrān ho jā.egā

taaki mujh pe shahr kī uryāniyāñ ġhālib na hoñ
apnī āñkheñ chhoḌ aayā huuñ maiñ apne gaañv meñ

maiñ ne zehnoñ se qadāmat ko khurach Daalā he
shahr kā shahr mire dar pe jabīñ-sā.ī kare

vo muhājir thā muhājir kā muhājir hī rahā
kab tire shahr meñ tadbīr guzāre kī huī

aTā hai shahar bārūdī dhueñ se
saḌak par chand bachche ro rahe haiñ

ka.aba-e-dil dimāġh kā phir se ġhulām ho gayā
phir se tamām shahr par ishq harām ho gayā