Tags-Shahr

miltā nahīñ makāñ jo sharīfoñ ke shahr meñ
uTTho tavā.ifoñ ke gharāne meñ ghar karo

ye shahr-e-kam-nazarāñ hai idhar na kar āñkheñ
yahāñ ishāra-e-mizhgāñ koī na samjhegā

mar hī na jaa.e zabt-e-fuġhāñ se kahīñ ye shahr
siine se is ke aah nikālo jhiñjhoḌ kar

arzāñ hai apne shahr meñ paanī kī tarah ḳhuuñ
varna vafā kā ḳhuun baḌā qīmtī bhī hai

TuuTe hue makāñ haiñ magar chāñd se makīñ
is shahr-e-ārzū meñ ik aisī galī bhī hai

shahr se nikle haiñ ham kis jurm kī pādāsh meñ
ye to us ko dekhnā thā vo sitamgar dekhtā

ye shahar jis meñ naam kamānā muhāl thā
ham guftugū-e-shahr the shohrat isī meñ thī

purkhoñ se jo milī hai vo daulat bhī le na jaa.e
zālim havā-e-shahr hai izzat bhī le na jaa.e

aaḌī tirchhī kuchh lakīreñ hī mileñgī shaam tak
shahr ke chaurāhe par tū apnī fankārī na rakh

bārhā shahr-e-vafā se guzre
ek sunsān fazā se guzre

sab se hañs ke gale jo miltā hai
shahr meñ vo nayā nayā hai kyā

shahr bhar meñ saḳht jaanī ke liye mash.hūr huuñ
merī ḳhātir ik na ik āzār honā chāhiye

kaise tarsīl karūñ sāma-e-yārāñ tak
shahr-āshob parindoñ kā sunā jā.ūñgā

muñh ko be-rūh kitāboñ se basīrat na milī
shahr se jaate hue sab ko jalā jā.ūñgā

mahfil-e-yārāñ nahīñ bazm-e-bahārāñ bhī nahīñ
ham jiye haiñ sākin-e-shahr-e-ḳhamoshāñ kī tarah

qais mile to us se pūchhūñ kyā tire jī meñ aa.ī divāne
shahr ko tū ne kis liye chhoḌā kyūñki ḳhush aayā tujh ko sahrā

ham ki jis shahr meñ the sog-nashīn-e-ahvāl
roz is shahr meñ ham dhuum machā.e bhī ga.e

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

jhuuT hoñToñ pe bilā-ḳhauf-o-ḳhatar aayā hai
muddatoñ shahr meñ rah kar ye hunar aayā hai

tiir aayā thā jidhar ye mire shahr ke log
kitne saadā haiñ ki marham bhī vahīñ dekhte haiñ