Tags-Shahr

charāġh is tīrgī meñ kab jalegā
ye shahr ābād haiñ par kab baseñge

hañgāma shahr-e-jāñ meñ musalsal lahū se hai
ehsās meñ hai jitnī bhī halchal lahū se hai

bāzār meñ ik chiiz nahiñ kaam kī mere
ye shahr mirī jeb kā rakhtā hai bharam ḳhuub

gaañv meñ kachche gharoñ kī qīmateñ baḌhne lagīñ
shahr se naql-e-makānī ahl-e-zar karne lage

ajiib us kī sarvarī na.ī hai shaan har ghaḌī
banoñ meñ shahr, shahr meñ sarāb dekhtā huuñ maiñ

aayā huuñ tañg shahr meñ vahshat ke haath se
jī chāhtā hai rāh-e-bayābān lījiye

shahar-o-sahrā kī kuchh nahīñ taḳhsīs
vus.at-e-dasht-e-jāñ se tañg huuñ maiñ

baḌe salīqe se noToñ meñ us ko tulvā kar
amīr-e-shahr se ab intiqām lenā hai

yā rab tirī rahmat kā talabgār hai ye bhī
thoḌī sī mire shahr ko bhī āb-o-havā de

sar-barahna huuñ to kyā ġham hai ki ab shahr meñ log
barguzīda hue dastār-e-fazīlat ke baġhair

kartā huuñ niind meñ hī safar saare shahr kā
fāriġh to baiThtā nahīñ sone ke bāvajūd

mor kise jañgal meñ jā kar apnā naach dikhātā hai
gīdaḌ kī shāmat aa.e to shahr kī jānib jaatā hai

hai jo andher shahr meñ ḳhurshīd
din ko le kar charāġh nikle hai

saḌkoñ par ik bhiiḌ hai 'ḳhāvar'
saarā shahr magar tanhā hai

tavāf-e-shahr-e-jānāñ se agar 'sajjād' fursat ho
thake pairoñ ke nīche ik masāfat aur rakhnī hai

kis tarah aa.e tirī bazm-e-tarab meñ aa.ina
hai nazar-band āj-kal shahr-e-halab meñ aa.ina

havā.eñ shahar se rotī huī guzartī haiñ
diloñ meñ ḳhauf kī ye ek lahr sī kyā hai

shahr-e-dillī to amānat hai mire purkhoñ kī
is ko be-rañg-o-sadā misl-e-samarqand na kar

jo raat ko apne saath liye aa.e the shahr kī galiyoñ meñ
ab nuur ke taḌke sub.hoñ ke āsār kī bāteñ karte haiñ

duur jā niklā kahīñ sūraj hamāre shahr kā
raat bhāgī aa rahī hai shaam ke saa.e hue