Tags-Shahr

jaane kis kī khoj meñ paiham bagūle aaj kal
phir rahe haiñ shahr kī galiyoñ meñ sahrā chhoḌ kar

mujh pe patthar pheñkne vāloñ ko tere shahr meñ
narm-o-nāzuk haath bhī dete haiñ patthar toḌ kar

bas is ḳhatā pe ki pahchānte haiñ kyuuñ sab ko
ye sāhibān-e-nazar shahr bhar meñ rusvā haiñ

gaañv meñ aa kar shahr base
gaañv bichāre jaa.eñ kidhar

shahr kā rog hai jis samt bhī bas jā.egā tū
khule sahrāoñ kī āvāz ko Das jā.egā tū

haañ shahr-e-ārzū thā kabhī ye ujaaḌ ghar
ab khañDaroñ se is kī kahānī sunā karo

raushnī hī raushnī hai shahr meñ
phir bhī goyā tīrgī hai shahr meñ

roz-o-shab ke shor-o-ġhul ke bāvajūd
ik tarah kī ḳhāmushī hai shahr meñ

rail kī paTrī pe so jaate haiñ log
kitnī āsāñ ḳhud-kushī hai shahr meñ

jo imārat hai vo sar se paañv tak
ishtihāroñ se sajī hai shahr meñ

gaañv chhoḌe ho chukī muddat magar
'ḳhāvar' ab tak ajnabī hai shahr meñ

maiñ hī ik zahar lagā apnoñ ko begānoñ ko
maiñ hī ik qatl huā shahar meñ sachchā ban kar

butān-e-shahr tumhāre larazte hāthoñ meñ
koī to sañg ho aisā ki merā sar le jaa.e

bahut sī surḳh āñkheñ shahr meñ achchhī nahīñ lagtīñ
tire jaage huoñ kā der tak sonā zarūrī hai

ab ke har shahr meñ phailā hai jo tā.ūn 'hafīz'
marne vāloñ ko ḳhushī hai ki ye saal achchhā hai

vo husn-e-yagāna hai koī shahr-e-tilismāt
har shaḳhs jahāñ rastoñ ke asrār meñ gum hai

ye shahr zinda hai lekin har ek lafz kī laash
jahāñ kahīñ se uThī shor mere ghar meñ rahā

kaun sā hai shahr jis meñ maiñ bhaTak kar aa gayā
rāste patthar ke haiñ aur bām-o-dar patthar kā hai

vo koī shai apnī kho chukī thī vo DhūñDhtī us ko phir rahī thī
vo shahr shahr aur gaañv gaañv talāsh meñ dar-ba-dar ga.ī vo

is shahar meñ ḳhvāboñ kī imārat nahīñ bantī
behtar hai ki ta.amīr kā naqsha hī badal lo