Tags-Shahr

jab se ik phuul se chehre ne nazar pherī hai
aisā lagtā hai ki is shahar se jaatī hai havā

mujhe nañg-e-naqsh hī kab kiyā bharīñ us ne aisī siyāhiyāñ
ki mire hī kūcha o shahr meñ mujhe ishtihār banā diyā

purānī bastī kī khiḌkiyoñ se maiñ dekhtā huuñ to sochtā huuñ
nayā jo vo shahr hai bahut hī ḳharāb tayyār ho rahā hai

junūñ ne barpā kiyā hai sahrā meñ shahr kī ta.aziyat kā jalsa
to 'farhat-ehsās' bhī ba-chashm-e-pur-āb tayyār ho rahā hai

hameñ ḳhabar hai ki hai kaun kitne paanī meñ
ye shahr sat.h-e-samandar se kitnā ūñchā hai

shahr kī raushan rāhoñ meñ bhī terī bāñheñ yaad aa.iiñ
ḳhud ko tanhā tanhā paayā bhuul huī sharminda huuñ

shahr-e-vafā ke saare raste terī jānib hī nikle
yā phir maiñ ne hosh gañvāyā bhuul huī sharminda huuñ

kyā ishq thā jo bā.is-e-rusvā.ī ban gayā
yaaro tamām shahr tamāshā.ī ban gayā

raat bhī vīrāñ fasīl-e-shahr bhī TuuTī huī
aur sitam ye jāgtā tū bhī nahīñ maiñ bhī nahīñ

shahr ke shahr hī behosh paḌe pūchhte haiñ
zindagī apne amal-dāroñ se nālāñ kyuuñ hai

raheñ na riñd ye zāhid ke bas kī baat nahīñ
tamām shahr hai do-chār das kī baat nahīñ

ye jo galiyāñ haiñ mire shahr kī haiñ merī rafīq
unhī galiyoñ meñ bahut vaqt guzārā apnā

qabze meñ un ke shahr-e-tilismāt hī sahī
kho jā.ūñ kyā ḳhudā kī ibādat nahīñ karūñ

aag ghar kī unheñ bhī yaad rahe
shahr meñ jo kabhī fasād kareñ

ab qabīle kī rivāyat hai bikharne vaalī
har nazar ḳhud meñ koī shahr hai bharne vaalī

is māh-e-chārdah kā chhape ishq kyūñke aah
ab to tamām shahr meñ mash.hūr ho gayā

junūñ vahī hai vahī maiñ magar hai shahr nayā
yahāñ bhī shor machā luuñ agar ijāzat ho

raqs-e-junūñ to ḳhair baḌī baat hai magar
ab shahar meñ numā.ish-e-idrāk bhī nahīñ

hameñ to ḳhvāb kā ik shahr āñkhoñ meñ basānā thā
aur is ke ba.ad mar jaane kā sapnā dekh lenā thā

shahr meñ vahshī aa.e haiñ
chal jañgal meñ Derā Daal