Tags-Shahr

maiñ apne shahr meñ phirtā huuñ ajnabī kī tarah
ajab nigāh se taktā hai mujh ko har koī

faqat āñkheñ hī āñkheñ rah ga.ī haiñ
ki saarā shahr miTTī meñ gaḌā hai

na so sakeñ jo ham āvārgān-e-kūcha-e-shauq
to tum bhī shahr kī shab-tāb mah-vasho mat so

dil pe guzrī jo vo guzrī shahr kyuuñ vīrāñ hue
ek dahshat sī hai phailī rāstoñ ke darmiyāñ

jaise ḳhushbū shahr meñ sahrā meñ jaise chāñdnī
yuuñ bikhar jaatā huuñ meñ tanhā.iyoñ ke darmiyāñ

kitne be-nūr haiñ ye hañgāme
maiñ bhare shahr meñ bhī huuñ tanhā

isī shahr meñ ka.ī saal se mire kuchh qarībī aziiz haiñ
unheñ merī koī ḳhabar nahīñ mujhe un kā koī patā nahīñ

kyā sitam hai ki bahāroñ ke hasīñ mausam meñ
ham parindoñ ne tire shahr se hijrat kī hai

DhūñDte phirte haiñ zaḳhmoñ kā mudāvā nikle
is bhare shahr meñ koī to masīhā nikle

chāñd se chehroñ pe pathrā.ī huī zard āñkheñ
koī batlāo ye kis shahr meñ ham aa nikle

tire baġhair jo ḳhvāboñ ke shahr meñ bhī dost
mirā mizāj hai barham yahī mohabbat hai

samundar ke kināre ik samundar ādamiyoñ kā
hamāre shahr meñ rahtā hai lashkar ādamiyoñ kā

māh-e-nau dekhne tum chhat pe na jaanā hargiz
shahr meñ eid kī tārīḳh badal jā.egī

na aag lagtī na taqsīm-e-jism-o-jāñ hotī
fuġhāñ ki shahr-e-sitam par nahīñ ijāra mirā

ai shahr-e-nā-murād tujhe kuchh ḳhabar bhī hai
dariyā dukhoñ ke zahr kā tujh ko Dubo.egā

ik aur khet pakkī saḌak ne nigal liyā
ik aur gaañv shahar kī vus.at meñ kho gayā

tamām shahr pe ġhālib thā dhuup kā lashkar
fasīl-e-shahr ke bāhar maiñ sā.ebān meñ thā

ye shahr yuuñ bhī to dahshat bharā nagar hai yahāñ
diloñ kā shor havā ko hirās kyā degā

tum ko kuchh yaad hai ghar ghar meñ mirā charchā thā
ab usī shahr meñ phirtā huuñ maiñ tanhā dekho

jis kī bīnā.ī se ik shahr huā thā raushan
aaj be-nūr hai vo dīda-e-bīnā dekho