Tags-Shajar

ishq tāsīr se naumed nahīñ
jāñ-sapārī shajar-e-bed nahīñ

shajar ko aag kisī aur ne lagā.ī thī
na jaane saañs meñ kyuuñ bhar liyā dhuāñ maiñ ne

jo dhuup kī aag us ne barsā.ī thī zamīñ par
to chhāñv meñ baiThne kī ḳhātir shajar diyā thā

aa gayā vo shajar-e-husn nazar jab ham ko
bosa le kar lab-e-shīrīñ ke chuvāre toḌe

jis ke saa.e ne jalāyā mujh ko
phir vo sarsabz shajar yaad aayā

jo ham-azāb thā us kī hī chhāñv meñ aa kar
ḳhud apnī dhuup kā lashkar shajar pe Daal diyā

shajar ne pūchhā ki tujh meñ ye kis kī ḳhushbū hai
havā-e-shām-e-alam ne kahā udāsī kī

chand tinke na the nasheman ke
bāġh-o-shāḳh-o-shajar kā qissa hai

yahī nahīñ ki parinde lahū bahāte haiñ
udaas tanhā shajar bhī to haa.e royā hai

na zaqan hai vo na lab haiñ na vo pistāñ na vo qad
seb o unnāb o anaar ek shajar se nikle

kyā jāniye kaisī thī vo havā chauñkā na shajar patta na hilā
baiThā thā maiñ jis ke saa.e meñ 'manzūr' vahī dīvār girī

hamāre shahr ke har sañg-bār se ye kaho
hamārī shāḳh-e-shajar par samar nahīñ aayā

qadam qadam shajar-e-sāya-dār paidā hai
ki mere saath safar meñ ḳhayāl hai us kā

shajar huuñ aur parindoñ se hai bahār mirī
ye mujh pe aa.eñ to phal-phūl aane lagte haiñ

āñkhoñ ke iztirāb se aise jhaḌe haiñ ḳhvāb
shab ke shajar pe niiñd kī sūrat paḌe haiñ ḳhvāb

kisī khañDar se guzartī havā kā nam! tirā ġham!!
shajar pe girtī huī barf kā tarab tirī yaad

gale lagā.e rahā sab kā dhyān thā itnā
ga.ī rutoñ kā shajar mehrbān thā itnā

dhuup ke dasht meñ be-sāya shajar meñ ham the
munhamik phir bhī sarāboñ ke safar meñ ham the

barg-o-bar ye tire kūche meñ to laatā hī nahīñ
jā ke biThlāveñg ḳhvāhish kā shajar aur kahīñ

yahāñ jo aaj shajar sāya-dār hai 'muztar'
yahīñ pe ham bhī kabhī barg-o-bār vaale the