Tags-Shajar

na raas aa.egā mujh ko koī shajar yaaro
abhī tavīl bahut hai mirā safar yaaro

chhāñv meñ baiTh kar ga.e haiñ sabhī
rah gayā phir se ik shajar tanhā

muhājrat ye shajar-dar-shajar havāoñ kī
basā.e jaatī hai ḳhāna-badoshiyāñ mujh meñ

aur kyā mere liye arsa-e-mahshar hogā
maiñ shajar hūñgā tire haath meñ patthar hogā

havā chalī to pareshāñ hue shajar aurāq
magar na the vo hamārī tarah bikharte hue

jab khilī hoñgī tamannā ke shajar par kaliyāñ
dasht-e-ummīd meñ tūfān sā uTThā hogā

biij bas apne shajar hone kā
ik irāda nazar aatā hai mujhe

ye jo sarsabz sā lagtā hai umīdoñ kā shajar
rut badalne pe ye ḳhāshāk bhī ho saktā hai

maiñ ne shāḳheñ tarāshīñ bulandī-e-nashv-o-numā ke liye
tum ko tesha milā tum ne to kaaT kar hī shajar rakh diyā

har barg-e-shajar par ḳhush ho kar gulshan meñ nichhāvar karne ko
nik.hat kā ḳhazāna khol diyā himmat hai ye aalī phūloñ kī

ek muddat se koī sabz na ubhrā is meñ
ghoñsle chiil ke be-barg shajar meñ haiñ abhī

jis ke saa.e meñ amaañ miltī hai merī ziist ko
mujh ko jaltī dhuup meñ aisā shajar lagte ho tum

dikhā.ī bhī to kahīñ de vo dhuup aane par
shajar vo hai ki hamīñ ko shajar kā dhokā hai

sunā hai raah meñ hote haiñ sāya-dār shajar
kabhī milūñgā kisī dard-āshnā se maiñ

jab shaam ke saa.e shajar-o-shāḳh se utre
ham takte hue rāh-guzar lauT ga.e haiñ

ai mausam-e-gul tū abhī aayā hai yahāñ par
jab shāḳh-o-shajar dīda-e-tar lauT ga.e haiñ

ik shajar thā jo us ke jaisā thā
us ko ham hāl-e-dil sunāte the

maiñ ruk sakūñgā Thahar sakūñgā thakan safar kī miTā sakūñgā
kahīñ to koī shajar milegā tamām raste yahī yaqīñ thā

ai mirī raah koī raah dikhā de mujh ko
dhuup oḌhūñ ki tah-e-shāḳh-e-shajar tak jā.ūñ

ab na shīshoñ pe girūñ aur na shajar tak jā.ūñ
maiñ huuñ patthar to kisī dast-e-hunar tak jā.ūñ