Tags-Shajar

havā-e-tund barg-e-be-shajar ko
uḌātī hai kidhar dekhā to jaa.e

koī saaya na shajar koī tamannā na umañg
uḌ ga.ī sar se ridā chaliye yahāñ se chaliye

kis kī ḳhātir ujaaḌ raste par
phuul le kar shajar khaḌā huā thā

raat bhar āvāra patte aur havā
raqs karte haiñ shajar ke ās-pās

aag oḌhe thā magar baañT rahā thā saaya
dhuup ke shahr meñ ik tanhā shajar aisā thā

ham ga.e jis shajar ke saa.e meñ
us ke girne kā ehtimāl huā

mohabbat aur ḳhushbū kā nagar taqsīm ho jaa.e
kahīñ aisā na ho ghar kā shajar taqsīm ho jaa.e

mujhe bahut tez dhuup darkār hai mohabbat ke is safar meñ
kabhī kahīñ sar pe saaya karne koī ghanerā shajar na aa.e

shajar-e-tar na yahāñ barg-e-shanāsā koī
is qarīne se sajāyā hai ye manzar kis ne

parinde DhūñDte phirte haiñ phir se jā-e-amāñ
shajar ke saath hī har ghoñsla bhī TuuT gayā

aur to mausam guzar kar jā chukā vaadī ke paar
bas zarā sī barf har sūkhe shajar meñ rah ga.ī

na.e mulkoñ meñ lagtā hai nayā sab
zamīñ kyā āsmāñ kyā aur shajar kyā

dil jal rahā hai zard shajar dekh dekh kar
ab chāhatoñ ke biij na boyā kareñge ham

ye alāmat kaun sī hai kis se pūchhūñ ai havā
pahlī rut meñ har shajar par zard pattā dekhnā

shajar meñ ziist ke hai shāḳh-e-ġham samar-āvar
jo in rutoñ meñ phale shā.irī to achchhā hai

tū bahāroñ kī jā tū libās-e-shajar maiñ ḳhizāñ kī sadā maiñ ġhubār-e-safar
tū numūd-e-matar maiñ hadīs-e-digar tū samundar hai maiñ sāhiloñ kī havā

jaane kab aa ke yahāñ baiThe the
apnā saayā bhī shajar meñ dekhā

barsāt tham chukī hai magar har shajar ke paas
itnā to hai ki aap kā dāman bhigo sake

qāfila umr kā paiham safar-āmāda sahī
shajar-e-sāya-fagan dekh ke thak jaatā hai

apnī kuchh baat hai ahbāb meñ varna ai shams'
sab dhuāñ hai vo jahāñ koī shajar lagtā hai