Tags-Shajar

maiñ gungunāte hue jā rahā thā naam tirā
shajar hajar bhī mire saath gungunāne lage

usī shajar pe shafaq kā karam hai shāyad aaj
vo ik shajar jo sunahrā dikhā.ī detā hai

na jidd-o-jahd-e-musalsal ne soz-o-sāz-e-hayāt
misāl-e-shajr zamīñ-bos maiñ jumūd meñ thā

tū ki maujūd agar misl-e-havā sehn meñ thā
shajar-e-jāmid-o-sākit ko hilā denā thā

tanhā shajar ke dard kā ehsās de gayā
ik shaḳhs mujh ko jism kā ban-bās de gayā

har fasl meñ hote haiñ javāñ saare shajar
har saal na.e phūlte-phalte haiñ samar

kuchh aise kam-nazar bhī musāfir hameñ mile
jo saaya DhūñDte haiñ shajar kāTne ke ba.ad

ḳhudā tab bebasī meñ shab sahar royā yaqīnan hai
guloñ se khilkhilāte jab shajar bhī ho ga.e patthar

gulshan gulshan shāḳh o shajar par roz nasheman jalte haiñ
kis ne kahā thā mausam badlā agle se hālāt nahīñ

koī shāḳh hai jise barg-o-bār nahīñ mile
koī shaam hai jise maiñ shajar nahīñ kar rahā

girya to 'qā.em' thamā mizhgāñ abhī hoñge na ḳhushk
der tak Tapkeñge bārāñ ke shajar bhīge hue

panāh-e-gāh-e-shajar fat.h kar ke soyā hai
masāfatoñ kī thakan se ye jism haarā huā

gar baqā kī hai tamannā to fanā kar ḳhud ko
biij sahtā hai sitam kitne shajar hone tak

koī suntā to ik kohrām barpā thā havāoñ meñ
shajar se ek pattā jab girā āhista āhista

fasl-e-gul meñ hai shajar ko fikr ne tanhā kiyā
fasl-e-gul ke baad vo tanhā na ho jaa.e kahīñ

abhī to kuchh log zindagī meñ hazār sāyoñ kā ik shajar haiñ
unhīñ ke sāyoñ meñ qāfile kuchh Thahar ga.e be-qayām kahnā

zamīñ mile kahīñ hameñ kahīñ to āsmāñ mile
dukhoñ kī dhuup meñ shajar koī to mehrbāñ mile

banā ke ghoñsla chiḌiyā shajar kī bāñhoñ meñ
na jaane kis liye āñdhī se Darī huī hai

ai maut ta.ajjub hai jo zīnat-e-gulshan hai
kaaTe vo shajar tū ne toḌe vo samar tū ne

ham ko pasand aa gayā sāhil kā mashvara
kashtī kī lakḌiyāñ the shajar ho ke rah ga.e