Tags-Shajar

jaise sahrā meñ ik shajar tanhā
ham ne yuuñ zindagī guzārī hai

shajar ko bār-āvar dekhnā maqsad nahīñ hai
ki meñ to bas zamīñ par ḳhvāb bonā chāhtā huuñ

dhuup meñ dekh kar parindoñ ko
ugne lagtā hai ik shajar mujh meñ

suukh jaatā hai har shajar mujh meñ
kuchh duā.eñ haiñ be-asar mujh meñ

zabāñ-bandī ke mausam meñ galī-kūchoñ kī mat pūchho
parindoñ ke chahakne se shajar ābād hote haiñ

us se mil ke bhī kab us se mil paa.e ham
biich meñ ḳhvāhishoñ ke shajar aa ga.e

shajar kī tāb-e-samā.at pe daad bantī hai
ye suntā aayā hai sadiyoñ se aadmī kā shor

shāḳh-dar-shāḳh tirī yaad kī hariyālī hai
ham ne shādāb bahut dil kā shajar rakkhā hai

bārish ke bāvajūd shajar sūkhne lage
dhartī ke paas ab koī poshāk bhī nahīñ

ik pal ko jahāñ baiThā huuñ thak kar kabhī 'aḳhtar'
raste meñ koī aisā shajar hī nahīñ aayā

āḳhirul-amr tirī samt safar karte haiñ
aaj is naḳhl-e-masāfat ko shajar karte haiñ

yuuñ bhī to ho ki sar ke sabab ho shikast-e-sañg
ye bhī to ho kabhī ki shajar se tabar kaTe

magan rahte haiñ ye būḌhe shajar apnī kathāoñ meñ
unheñ aatā hai apne zehn kī jannat meñ ḳhush rahnā

jo pūchhā kyā huiiñ shāḳheñ samar-ba-dast jo thiiñ
kahā ki dekh lo sab kuchh shajar se zāhir hai

tire husn se mire ishq tak ye jo nisbatoñ ke haiñ silsile
ye shajar haiñ ek hī baaġh ke ye samar haiñ ek hī Daal ke

girā diyā hai jise āñdhiyoñ ke zor ne kal
ye ḳhush-navā usī būḌhe shajar se aa.e haiñ

aarzū thī ki shajar ko samar-āvar dekhūñ
baur paḌte hī magar sahn meñ patthar aa.e

vo banā letā hai apnā ghoñsla dīvār meñ
jis parinde kā shajar meñ āshiyāñ rahtā nahīñ

baiThe the jis kī chhāñv meñ ham donoñ muddatoñ
kyā jaane aaj kyuuñ vo shajar yaad aa gayā

us kī shāḳhoñ pe phal nahīñ lagtā
jis shajar se maiñ kaT ke aayā huuñ