Tags-Shama

sham.a kī aag meñ dil jalte haiñ parvānoñ ke
hausle dekhiye in soḳhta-sāmānoñ ke

musāfir-e-ḳhvāb ke liye haiñ ye merī āñkhoñ ke phuul 'sājid'
aur ik sitāre ke dekhne ko ye aag utrī hai sham.a-dāñ se

agar ye rañgīnī-e-jahāñ kā vajūd hai aks-e-āsmāñ se
to phir ruḳh-e-sham-o-ā.ina par khilā hai ye rañg-e-ḳhūñ kahāñ se

majbūr haiñ sab apnī uftād tabī.at se
ho sham.a se kyā shikva parvāne ko kyā kahiye

jalne ko sham.a bhī jalī parvāna bhī jalā
kaise kaheñ ki kis kā vafādār kaun hai

jaan dete hī banī ishq ke dīvāne se
sham.a kā haal na dekhā gayā parvāne se

ai mirī sham-e-shabistān-e-vafā
bhuul jā mere liye

sham.a kī tarah pighalte hue dil dekhe haiñ
ashk ban ban ke nikalte hue dil dekhe haiñ

sham-o-parvāna jo pūchheñ soz-e-ishq
apnī biitī yā mirī biitī kaho

kyā faroġh-e-bazm us mah-rū kā shab sad-rañg thā
sham.a nahiñ sharminda aur mah dekh ruḳh ko dañg thā

husn to hai ik tajallī sham-e-har-mahfil-sifat
vo to kah degā ye ik andāz-e-māshūqāna thā

haa.e vo shahbā-e-zulf-o-kākul-o-gesū ki jab
āftāb-e-sub.h bhī ik sham-e-ishrat-ḳhāna thā

maiñ agar gul thā to vo thā bulbul-e-shaidā mirā
aur agar vo sham.a thā to is kā maiñ parvāna thā

zīnat muqaddama hai musībat kā dahr meñ
sab sham.a ko jalāte haiñ sāñche meñ Dhaal ke

a sham.a intihā-e-fareb-e-ḳhyāl dekh
masjūd sākinān-e-falak kā ma.aal dekh

bazm-e-jahāñ meñ meñ bhī huuñ a sham-e-dardmand
faryād dar girah-e-sifat daana sipand

jab se patañg huuñ maiñ tire sham.a-rū kā yaar
ma.alūm thā na tujh ko uḌānā patañg kā

na kyūñkar bazm meñ raushan ho apnī shab ye dil-sozī
ki ulfat sham.a-rū se ham bhī juuñ parvāna rakhte haiñ

sham.a ne parvānoñ ke ġham meñ
raat guzārī jalte jalte