Tags-Shama

ḳhamosh sham-e-mohabbat hai phir bhī husn kī zau
guloñ se tā-ba-surayyā hai dekhiye kyā ho

sham-e-mahfil kā huā ye rañg un ke sāmne
phuul kī hotī hai sūrat jaise murjhāne ke ba.ad

sham.a māshūqoñ ko sikhlātī hai tarz-e-āshiqī
jal ke parvāne se pahle bujh ke parvāne ke ba.ad

go ba-nām ik zabān rakhtī hai sham.a
kab tirā sā bayān rakhtī hai sham.a

aah is dāġh-e-dil se jis se ki dast
nit sū-e-āsmān rakhtī hai sham.a

kyūñki parvāna rashk se na jale
sab ke aage fulān rakhtī hai sham.a

rove go tuuda tuuda kab aise
dīda-e-ḳhūñ-fishān rakhtī hai sham.a

daaġh par daaġh uThā.e dil kī tarah
kab ye tāb-o-tavān rakhtī hai sham.a

rātoñ jaagī hai misl 'qā.em' kī
tab ye soz-e-nihān rakhtī hai sham.a

sarfaroshī ke muḳhtara.a ham haiñ
go ab ūñchī dukān rakhtī hai sham.a

ye dil afsurda vaa.e qismat-e-bad
soz tā-ustuḳhvān rakhtī hai sham.a

tere mukhḌe kā sā namak ma.alūm
ek phīkī sī aan rakhtī hai sham.a

khol mukhḌā ki hai ye mujh ko yaqīñ
tujh se da.avā gumān rakhtī hai sham.a

sar-e-tāq-e-tamannā bujh ga.ī hai sham-e-umīd
udāsī baḌh ga.ī hai be-dilī kam ho ga.ī hai

sham.a maġhrūr na ho bazm-farozī pe bahut
rāt-bhar kī ye tajallī hai sahar kuchh bhī nahīñ

sham.a hai gul bhī hai bulbul bhī hai parvāna bhī
raat kī raat ye sab kuchh hai sahar kuchh bhī nahīñ

jab bhī uThtī hai vo nazar 'iqbāl'
sham.a kī tarah dil pighalte haiñ

patañg kyūñkar na hove hairāñ ki sham.a shab ko dikhā rahī hai
ba-chashm-e-giryāñ o tāj-e-zar se falak pe bijlī zamīñ pe bārāñ

sham-e-hastī huī bedār falak se kah do
az.hdahān-e-shab-e-zulmat ke dahāne khul jaa.eñ

birah kī aag meñ sābit-qadam chal
'sirāj' ab sham.a kā ham-rañg ho jā