Tags-Shama

zabān-e-sham.a se zāhir ho soz-e-parvāna
kuchh is tarah se jalā sozish-e-nihāñ mujh ko

vo sham.a bujh ga.ī thī to kohrām thā tamām
dil bujh ga.e to shor-e-azā kyuuñ nahīñ huā

mohabbat-āshnā dil maz.hab-o-millat ko kyā jaane
huī raushan jahāñ bhī sham.a parvāna vahīñ aayā

parvāne se sham.a kyā chhupegī
maiñ bhī pūchhūñgā tū jahāñ hai

ai 'nādir' un ke husn kī tārīf kyā likhūñ
sham-e-lagan se baḌh ke haiñ pur-nūr piñDliyāñ

tābāñ misāl-e-sham.a haiñ fānūs-e-nūr se
har-chand pā.ichoñ meñ haiñ mastūr piñDliyāñ

na us ke dāman se maiñ hī uljhā na mere dāman se ye hī aTkī
havā se merā bigāḌ kyā hai jo sham-e-turbat bujhā rahī hai

husn kab ishq kā mamnūn-e-vafā hotā hai
laakh parvāna mare sham.a pe kyā hotā hai

ye dāmān-e-havādis se qayāmat tak na gul hogā
charāġh-e-dil mirā raushan hai un kī sham-e-mahfil se

jalā hai haa.e kis jān-e-chaman kī sham-e-mahfil se
mahak phūloñ kī aatī hai sharār-e-ātish-e-dil se

sham.a-rū par misāl-e-parvāna
ho ga.e ham nisār hī āḳhir

kaam aayā na jaa.e sham-e-mazār
ye dil-e-dāġh-dār hī āḳhir

sham.a saañ jalte hilte kaaTī umr
jab talak sar rahā vabāl rahā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

TaToltā huuñ dar-e-tāq ajnabī kī tarah
mire makāñ ke añdheroñ meñ sham.a-dāñ chup hai

ai sham.a tujh pe raat ye bhārī hai jis tarah
maiñ ne tamām umr guzārī hai is tarah

aa gayā jab bazm meñ vo shola-rū
sham.a to bas ho ga.ī jal kar talaf

jo sham.a itnī raat jalī kyuuñ vo bujh ga.ī
jo shauq ho chalā thā fuzūñ kaun le gayā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ