Tags-Shama

ai raat sarāboñ ke sivā kuchh na milegā
maiñ din ke ujāle meñ agar sham.a jalā duuñ

shaam hone ko hai jalne ko hai sham-e-mahfil
saañs lene kī bhī fursat nahīñ parvāne ko

kyā koī khel hai benām-o-nishāñ ho jaanā
vaise to sham.a bhī tayyār hai jal jaane ko

tumhārī sham-e-tamannā bas ek raat bujhī
charāġh merī tavaqqo.a ke roz bujhte haiñ

sham.a kuchh jaltī nahīñ parvāna bhī detā hai jī
sozish-e-ulfat se hai jī kā zarar donoñ taraf

is añdhere meñ to Thokar hī ujālā degī
raat jañgal meñ koī sham.a jalāne se rahī

raat bhar meñ sham-e-mahfil jal-bujhī
āshiqoñ kā dil jalānā aur hai

tū kisī shakl meñ ho maiñ tirā shaidā.ī huuñ terā saudā.ī huuñ
tū agar sham.a hai ai dost maiñ parvāna tirā ya.anī dīvāna tirā

kab sham.a tere husn ke sho.ale ke rū-ba-rū
mahfil meñ kar sake kam-o-besh-e-ziyā se bahs

maiñ ba-dastūr jalūñgā ye na hogī 'muztar'
merī sāthī shab-e-ġham sham-e-sahar hai bhī to kyā

dāġh-e-jigar kā apne ahvāl kyā sunā.ūñ
bharte haiñ us ke aage sham-o-charāġh paanī

jaane vo dil thā yā diyā koī
raat jaltā thā sham.a-dāñ meñ kyā

shab ko garm-e-raqs hotā hai jo vo ātish-mizāj
sham.a saañ jalte haiñ saare anjuman ke haath paañv

bad-gumānī kī havā se gul na ho sham-e-vafā
zehn-o-dil meñ ho rahī haiñ aaj ye sargoshiyāñ

kyā fā.eda hai qissa-e-rizvān se tujhe
koī sham.a-rū parī sate tū bhī lagan lagā

husn be-ishq kahīñ rah nahīñ saktā zinda
bujh ga.ī sham.a bhī parvāne ke jal jaane se

ho gayā Dher vahīñ aah bhī niklī na koī
jaane kyā baat kahī sham.a ne parvāne se

terā sho.ala phūñk saktā hai use maanā magar
soch le ai sham.a apnā hashr parvāne ke ba.ad

vo lauT ke ā.eñge is aas meñ āñkhoñ ko
dahlīz pe rakkhā hai aur sham.a bujhā dī hai

jo sham.a-rū ke do lab haiñ shīrīñ to sabza-e-ḳhat bajā hai us par
zamīn pakḌī hai tūtiyoñ ne sunīñ jo mīThī piyā kī batiyāñ