Tags-Shama

ye kaun sā parvāna muā jal ke lagan meñ
hairat se jo hai sham.a kī añgusht dahan meñ

yūñhī aatī jā.egī shām-e-visāl
yūñhī sham-e-bazm jaltī jā.egī

jaltī bujhtī raushnī kā khel bachchoñ ko dikhā.eñ
sham.a rakkheñ haath meñ ghar meñ havā raushan kareñ

na laayā koī sham-o-gul gor par
lahad meñ bhī dāġh-e-mohabbat jale

dil sulagte raheñ parvā nahīñ hotī kuchh unheñ
sham.a achchhī ki jalā detī hai parvāne ko

nafrat ye in guloñ ko hai marne ke ba.ad bhī
hotā nahīñ hai gul mire sham-e-mazār meñ

ilm kī sham.a haath meñ le kar
sab ko apne saath meñ le kar

sar-tā-qadam zabān haiñ juuñ sham.a go ki ham
par ye kahāñ majāl jo kuchh guftugū kareñ

tajalliyoñ meñ ho taqsīm ḳhāk-e-dil kyūñ-kar
hazār sham.a farozāñ aur ek parvāna

kaho sham.a se ki ye naql kyā koī apnā qissa-e-ġham kahe
kare ab fasāne ko muḳhtasar ki mujhe umīd-e-sahar nahīñ

sub.h karnā shām-e-ġham kā al-amāñ
sham.a ko dāñtoñ pasīna aa gayā

ho us bazm meñ sham.a kab raunaq-afzā
jahāñ mahfil-afroz mah-rū na hove

Dūbte tāroñ se pūchho na qamar se pūchho
qissa-e-ruḳhsat-e-shab sham-e-sahar se pūchho

husn meñ jab ta.iiñ garmī na ho jī deve kaun
sham-e-tasvīr ke kab gird patañg aate haiñ

vahī barq-e-tajallī sham.a hai mere shabistāñ kī
na lā saktī thī jis kī taab shāḳh-e-āshiyāñ pahle

jo sho.ala sham.a ke dil meñ hai raushan
usī sho.ale se parvāne bane haiñ

be-iḳhtiyār sun kar mahfil meñ sham.a ro de
ham baat soz-e-dil kī gar Tuk zabāñ pe lāveñ

'sirāj' us sham.a-rū ban jal gayā hai
nipaT hasrat ke sho.aloñ kī lapaT meñ