Tags-Shama

maiñ tujh ko magar jaan gayā sham-e-tamannā
samjhī thī ki jal jā.egā shā.er hai patiñgā

banā.eñ na ab us ko ab sham-e-mahfil
jalā dil nahīñ hai jalāne ke qābil

zarā chheḌā jo us ne ho ga.ī aisī za-ḳhud-rafta
ki sham-e-bazm ne gul-gīr ke lab par zabāñ rakh dī

sham.a ban kar jal ga.ī merī hayāt
sho.ala-e-gulnār ho kar rah ga.ī

dhyān kī sham.a kī lau tez bhī kar dete haiñ
aksar auqāt tirī yaad ke phere dil meñ

jahāñ hai kor aur ḳhurshīd mahjūb
kahāñ tak sham.a har mahfil se badle

shoḳhī-e-husn jigar-soz kā iimā ye na thā
bigḌī hai sham.a kī mahfil meñ havā aap hī aap

sham-e-mahfil tumheñ kahtā thā zamāna dekhā
huā parvāna uḌ ke fidā aap hī aap

ek sham-e-umīd jaisā tū
is pighaltī huī shab-e-ġham meñ

hai dil ke vāste sham-e-umīd-o-mash.al-o-rāh
vo ik nigāh jise dil se vāsta bhī nahīñ

chhoḌ kar ham ko milā sham.a-ruḳhoñ se jā kar
isī qābil hai tū ai dil ki jalā.eñ tujh ko

tujhe ai sham.a kyā dekheñ zamāne ko dikhānā hai
hameñ juuñ kāġhaz-e-ātish-zada aur hī charāġhāñ ko

jo jalātā hai kisī ko ḳhud bhī jaltā hai zarūr
sham.a bhī jaltī rahī parvāna jal jaane ke ba.ad

yūsuf se le ke tā-gul phir gul se le ke tā-shamma
ye husn kis ko le kar bāzār tak na pahuñchā

tābinda har-nafas hai ummīd kī badaulat
mehrāb-e-zindagī meñ ik sham.a jal rahī hai

fānūs ban ke jis kī hifāzat havā kare
vo sham.a kyā bujhe jise raushan ḳhudā kare

jalā aur jal ke soz-e-rashk se dil bujh gayā fauran
agar hotā charāġh-o-sham.a us mahfil meñ rah jaatā

koī sham.a hai ki jo bujh ga.ī to na.e sire se jalā liyā
ye charāġh dil kā charāġh hai use āñdhiyoñ se bachā.e rakh

dil ko mere na zarā rañj shab-e-tār rahā
sham-e-afroz ḳhayāl-e-ruḳh-e-kaddār rahā