Tags-Shama

avval-e-shab vo bazm kī raunaq sham.a bhī thī parvāna bhī
raat ke āḳhir hote hote ḳhatm thā ye afsāna bhī

sham.a kī lau pe sar-e-shām sulagte jalte
kisī parvāne ko dekhoge to yaad ā.ūñgā

jalte bhunte rahe ham bazm-e-butāñ meñ lekin
sham.a saañ us pe bhī sar dene ko tayyār rahe

ab bhī chipkā hai mirī āñkhoñ meñ
jo dhuāñ sham.a sahar meñ dekhā

jalva-e-ishq haqīqat thī husn-e-majāz bahāna thā
sham.a jise ham samjhe the sham.a na thī parvāna thā

apnī āñkhoñ meñ hasīñ ḳhvāb sajā.e rakkho
laakh tūfān uTheñ sham.a jalā.e rakkho

chup hai parvāna to kyā sham.a ko ḳhud hai iqrār
aap hī jalte haiñ auroñ ko jalāne vaale

burīda shāḳheñ haiñ yā sham.a-hā-e-gul-shuda haiñ
ḳhamīda peḌ hai yā maqbara banā huā hai

sham-e-aḳhīr-e-shab huuñ san sar-guzasht merī
phir sub.h hote tak to qissa hī muḳhtasar hai

ho chuke ḳhaak jo jal kar vo patañge ai sham.a
dūsrī baar tire sho.ale se jalne ke nahīñ

ḳhvāhish ke musāfir to ab tak tārīki-e-jāñ meñ chalte haiñ
ik dil ke nihāñ-ḳhāne meñ kahīñ jaltī hai sham-e-zamīr to kyā

hamārī sham-e-tamannā bhī jal ke ḳhaak huī
hamāre sho.aloñ kā aalam chitāoñ jaisā hai

sham-e-ruḳhsār liye gesū-e-ḳhamdār liye
sab añdheroñ meñ ujāloñ meñ mire paas raho

sham.a saañ rishte par ulfat ke lagā dete haiñ sar
āshiq aur ma.ashūq sā bhī dūsrā naatā nahīñ

us sā māshūq jahāñ meñ koī mujh sā āshiq
'arsh' aage na huā thā na huā mere ba.ad

jo sham.a-tan huā shab-e-hijrāñ meñ sarf-e-ashk
par jis qadar maiñ chāhe thā utnā na ro sakā

shaam hone ko hai jalne ko hai sham-e-mahfil
saañs lene kī bhī fursat nahīñ parvāne ko

zamām-e-kār agar mazdūr ke hāthoñ meñ ho phir kyā
tarīq-e-koh-kan meñ bhī vahī hiile haiñ parvezī

miyān-e-mahshar malālatoñ se maiñ sham.a huuñ dil kī hālatoñ se
ki paañv tak sau ḳhijālatoñ se araq bahā hai mirī jabīñ kā

havā-e-dahr kī zad meñ bhī aa ke bujh na sakī
balā kā hausla ik sham-e-rahguzār meñ thā