Tags-Shama

ai sham.a tujh se saaf maiñ kahtā huuñ dil kā haal
jalnā hī thā to jal na gayā sar se paañv tak

rone vaale hue chup hijr kī duniyā badlī
sham.a be-nūr huī sub.h kā taarā niklā

jahāñ meñ ġham se kui ishrat-kada nahīñ ḳhālī
hai sham.a bazm meñ giryāñ chaman meñ shabnam hai

koī raushan to kare sham-e-shabistān-e-ḳhayāl
munjamid chashma-e-anvar nahīñ dīvāno

hamārī sī mohabbat tum ko ham se ho to kyā guzre
banā de sham.a ko bhī ishq parvāna to kyā hogā

ātish-e-ġham meñ bas ki jalte haiñ
sham.a saañ ustuḳhvāñ pighalte haiñ

sham.a-rū siiñ 'sirāj' jā kar bol
ki patiñgoñ kuuñ mat jalātā rah

aa.e jo bazm meñ to uThā chehre se naqāb
parvāne hī ko sham.a se bezār kar chale

ham haiñ ek sham.a magar dekh ke bujhte bujhte
raushnī kitne añdheroñ ko diye jaate haiñ

sikkoñ ke evaz jo bik jaa.e vo merī nazar meñ husn nahīñ
ai sham-e-shabistān-e-daulat tū hai jo parī-timsāl to kyā

vaqār-e-ishq yuuñ bhī sham.a kī nazroñ meñ kuchh kam hai
patiñge ḳhud chale aate haiñ bulvā.e nahīñ jaate

sham-e-dil sham-e-tamannā na jalā maan bhī jā
tez āñdhī hai muḳhālif hai havā maan bhī jā

sham.a sā jab shaam hī se hai gudāz-e-dil 'ravāñ'
sub.h tak kyā jaane kyā hālat tirī ho jā.egī

TuuTā tilism-e-ahd-e-mohabbat kuchh is tarah
phir aarzū kī sham.a firozāñ na kar sake

umiid aisī na thī mahfil ke arbāb-e-basīrat se
gunāh-e-sham.a ko bhī jurm-e-parvāna banā deñge

aqīde bujh rahe haiñ sham-e-jāñ gul hotī jaatī hai
magar zauq-e-junūñ kī sho.ala-sāmānī nahīñ jaatī

ḳhaak se hamārī bhī ho kabhī guzar terā
bar-zabān-e-sham-o-gul kuchh kalām kar lenā

hadīs-e-soz-o-sāz-e-sham-o-parvāna nahīñ kahte
ham apnā hāl-e-dil kahte haiñ afsāna nahīñ kahte

sham.a-sūrat ek din jalnā hai apnī aag meñ
lazzat-e-soz-e-darūñ se āshnā ho jā.iye

ġham aur bhī dil kā jo shab-e-hijr baḌhā.e
is sham-e-fasurda ko bujhā kyoñ nahīñ dete