Tags-Shama

dāġh-e-firāq-e-sohbat-e-shab kī jalī huī
ik sham.a rah ga.ī hai so vo bhī ḳhamosh hai

shab ke āḳhir hote hote donoñ hī jab jal bujhe
kis ko samjheñ sham-e-mahfil kis ko parvāna kaheñ

patiñge sham.a ke sadqe hoñ bulbuleñ gul par
koī kisī ke fidā ho maiñ huuñ fidā-e-habīb

ham shahr meñ ik sham.a kī ḳhātir hue barbād
logoñ ne kiyā chāñd ke sahrāoñ ko ābād

'ājiz' talāsh-e-sham.a meñ parvāne mahv haiñ
hairat unheñ hai un ko agar DhūñDte haiñ ham

shab ham ġhazal-sarā the 'ravish' bazm-e-nāz meñ
sham-e-adab-shanās ke lab par durūd thā

sham-e-tarab jalva-fagan ās-pās
mash.al-ġham nūr-fishāñ duur tak

laakh rotī rahī jaltī rahī afsos magar
zindagī sham.a kī ik raat se aage na baḌhī

ham-rañg-e-sham.a ishq meñ tere huuñ va-lekin
ye soz-e-jigar ātish mujmar se kahūñgā

mire atrāf hai tīra-shabī meñ nuur kā halqa
ki sham-e-rāh maiḳhāne se ghar tak jaam hai saaqī

ye pighaltī hī nahīñ sham.a ki jaltī hī nahīñ
ye bikhartā hī nahīñ dasht ki martā hī nahīñ

sham-o-parvāna kā andāz nayā hai ki nahīñ
zikr thā jis kā ab us bazm meñ chal kar dekho

shauq meñ terī teġh kā yaksar
sham.a saañ tan tamām gardan hai

toḌ kar tan ko karo bārīk parde kī misāl
sham-e-nūrānī lagā fānūs-e-tan tābāñ karo

har sū hai tārīkī chhā.ī tum bhī chup aur ham bhī chup
kis ne aisī sham.a jalā.ī tum bhī chup aur ham bhī chup

ab yahāñ se nahīñ jā saktā koī
ab yahāñ sham.a jalā dī ga.ī hai

dāman-e-fānūs meñ ai sham.a ḳhud-dārī nahīñ
kisvat-e-nāmūs agar chāhe to parvāne meñ aa

sham.a kahtī rahī jise shab bhar
ḳhātme par vo dāstāñ hai ab

jhūTī hī tasallī ho kuchh dil to bahal jaa.e
dhu.dlī hī sahī lekin ik sham.a to jal jaa.e

saath dene kā to ehsān hai mujh par lekin
sham.a ne naam Duboyā mirī tanhā.ī kā