Tags-Shama

misl-e-parvāna sham.a-rū pe 'sirāj'
dil jalāne kā vaqt aayā hai

sho.ala-e-sham.a meñ garmī ye kahāñ se aa.ī
is kī garmī se to fānūs jalā jaatā hai

mahfil-e-yār meñ kuchh baat na niklī muñh se
kahne ko sham.a kī mānind zabāñ rakhte haiñ

phir sar-e-dār-e-vafā rasm ye Daalī jaa.e
gul ho ik sham.a to ik aur jalā lī jaa.e

kaam kyā sham.a kā hai le jaao
dilbar-e-āftāb-rū hai yahāñ

poshāk se badan kī tajallī hai āshkār
fānūs-e-sham-e-tūr tumhārā libās hai

ik sham.a kī sūrat meñ manzūr kiyā jā.ūñ
ik ghar kī hifāzat par māmūr kiyā jā.ūñ

sham.a-rū āshiq ko apne yuuñ jalānā chāhiye
kuchh hañsānā chāhiye aur kuchh rulānā chāhiye

jab mire atrāf-e-nādīda fasīleñ khīñch diiñ
mere ehsāsāt ko sham-e-farozāñ kar diyā

ye bhī kyā jiine meñ jiinā hai baġhair un ke 'adīb'
sham.a gul kar dī ga.ī baaqī dhuāñ rahne diyā

dāġh-e-firāq-e-sohbat-e-shab kī jalī huī
ik sham.a rah ga.ī hai so vo bhī ḳhamosh hai

zulmat-kade meñ mere shab-e-ġham kā josh hai
ik sham.a hai dalīl-e-sahar so ḳhamosh hai

ham ne tanhā-nashīnī ḳharīdī to hai raunaq o shorish-e-anjuman bech kar
sham.a mehrāb-e-dil meñ jalā.ī to hai ārzūoñ kā apnī kafan bech kar

tirī zulfāñ meñ yū mukh jo ki dekhe
use sham-e-shabistāñ yaad aave

sham-e-vafā jalāte haiñ zulmat-kadoñ meñ jo
vo log is jahāñ meñ pareshāñ hue to haiñ

is qad o ruḳhsār par ai sham.a-rū is husn par
qamrī o bulbul kare hai vajd aur parvāna raqs

ek aurat jo mere liye muddatoñ
sham.a kī tarah aañsū bahātī rahī

zālim ye bazm-e-husn kā achchhā rivāj hai
tū sham.a ho ke bhī na jale maiñ tapāñ rahūñ

parvāne ko ham sham.a samajhte haiñ sar-e-shām
hañgām-e-sahar sham.a ko parvāna kaheñge

girya-e-ātshīñ kī daad de shab-e-ġham to kaun de
ḳhud sar-e-shām kyā bujhī sham.a ne dil bujhā diyā