Tags-Shama

sham-e-iḳhlās-o-yaqīñ dil meñ jalā kar chaliye
zulmat-e-yās meñ ummīd jagā kar chaliye

umīdeñ jāgtī rahtī haiñ sotī rahtī haiñ
darīche sham.a jalāte bujhāte rahte haiñ

vo rañgīlā haath mere dil pe aur us kī mahak
sham-e-dil bujh sī ga.ī rañg-e-hinā ke sāmne

muñh se āñchal jo haTātā vo sar-e-bazm 'jalīl'
ba-ḳhudā sham.a ko parvāna banāyā hotā

un ke aate bazm meñ kyuuñ hosh sab ke uḌ ga.e
duur hotā hai añdherā sham.a jal jaane ke ba.ad

panāve be-gudāz-e-mom rabt-e-paikar-ārā.ī
nikāle kyā nihāl-e-sham.a be-tuḳhm-e-sharār ātish

faroġh-e-husn se hotī hai hall-e-mushkil-e-āshiq
na nikle sham.a ke pā se nikāle gar na ḳhaar ātish

sāmne ik kitāb adh-khulī aur maiñ
be-sabab sham.a jaltī huī aur maiñ

zabt-e-girya na hovegā juuñ sham.a
soz-e-dil gar tumheñ sunā.iyegā

kyuuñ sham-e-intizār bujhāte ho ai 'qamar'
naale haiñ ye kisī ke sahar kī azaañ nahīñ

be-tarah kuchh ghulā hī jaatā hai
sham.a kī tarah dil ko chor lagā

ḳhudā rakkhe dil-e-pur-soz terī shola-afshānī
ki tū vo sham.a hai jo raunaq-e-darbār-e-hastī hai

sūjhe magar kyā sham.a ko apne ujāle ke sivā
har chand zauq-e-dīd kā maidān tārīkī to hai

abhī se kāñptā hai sham.a kā dil
abhī us ne naqāb ulTī nahīñ hai

havā kī āhaTeñ suntā huuñ dhaḌkanoñ kī tarah
misāl-e-sham.a mujhe rāt-bhar jagā.e vo

fitrat ke begār sabhī
sham.a hai parvāna hai

mujhe raat saarī hī tere haañ kaTe kyuuñ ke rote na sham.a saañ
ki ho sake hai kuchh ab bayāñ na ye baat hai ki zabāñ nahīñ

sham.a bhī is safā se jaltī hai
tere ruḳh par nigah phisaltī hai

ruḳh-e-raushan ke aage sham.a rakh kar vo ye kahte haiñ
udhar jaatā hai dekheñ yā idhar parvāna aatā hai