Tags-Shama

ai sham-e-sub.h-e-mahfil un ko jalā ke bujhnā
do-chār aur tere parvāne rah ga.e haiñ

nabī sadqe rayan saarī do tan juuñ sham.a jaltī thī
jo taare ke naman rahī thī 'qutub' shah chāñd suuñ mil meñ

dekhā to ek sho.ale se ai shaiḳh-o-barhaman
raushan haiñ sham-e-dair o charāġh-e-haram baham

juuñ sham.a laboñ par aa rahā jī
tan thā so gudāz kar ga.e ham

yād-e-gul-e-ruḳh se phuul jhaḌte haiñ
kis bashāshat se nau-bahār hai sham.a

nahīñ bujhtī lagī huī jī kī
shola-e-jān-e-sogvār hai sham.a

roz-e-tīra meñ bad-numā ḳhurshīd
shab-e-raushan meñ tīra-kār hai sham.a

kyuuñ na ro.e na kis tarah se jale
ki fuġhānī-e-rāz-dār hai sham.a

shab-e-tanhā.ī aur tū aur ye
ai 'qalaq' terī ġham-gusār hai sham.a

ruḳh-e-raushan hai nūr-e-bīnā.ī
chashm-e-ushshāq kā ġhubār hai sham.a

sub.h hote hī TimTimātī hai
aap kī chashm-e-pur-ḳhumār hai sham.a

jhāñknā parde se burī ḳhū hai
ḳhud-ba-ḳhud aap sharmsār hai sham.a

pa.e-jumbish sadā taḌaptī hai
tapish-e-nā-tavāñ shikār hai sham.a

husn dīvāna sab ko kartā hai
apne hī aap par nisār hai sham.a

husn bhī hai ma.āl-e-kār vabāl
bazm-dar-bazm kyā hai ḳhaar hai sham.a

nahīñ dil meñ kisī ke soz-o-gudāz
ki tamāshā-e-rozgār hai sham.a

ḳhaak nāsūr-e-dil bhare is kā
zaḳhmī-e-girya-hā-e-zār hai sham.a

hai idhar dāġh-e-barq-e-parvāna
aur udhar chashm-e-abr-bār hai sham.a

dīda-e-sarf-e-intizār hai sham.a
merī hālat kī yādgār hai sham.a

sham.a kī lau par havā ne hoñT apne rakh diye
vajd meñ aa kar dhuāñ tā-der lahrātā rahā