Tags-Shama

vo nahīñ huuñ maiñ ki jis par koī ashk-bār hotā
kabhī sham.a bhī na rotī jo mirā mazār hotā

sham.a ke dam se bazm munavvar
kahne ko mehmān-e-shabīna

sham.a kī nazr idhar jaan patañgoñ kī huī
vaqf-e-gul-gīr idhar sham.a kā sar hai ki nahīñ

jalā rahe sham-e-bazm sā.īñ uThā ke pahlū se apne ham ko
raqīb ko misl-e-dil baġhal meñ miyān-e-mahfil biThālte haiñ

juuñ jale hai sham.a kā musht-e-zar aur tasbīh-e-ashk
jis tarah sarkash kā hai duniyā ḳharāb aur diiñ ḳharāb

sham.a kī tarah ik lagan meñ mire
'mus.hafī' kab samāte haiñ aañsū

jab se sham-e-vafā jalā.ī hai
anjuman ban ga.ī hai tanhā.ī

aa jaao ab to zulf pareshāñ kiye hue
ham raah par haiñ sham.a farozāñ kiye hue

ḳhūn-e-dil apnā jal rahā hai magar
sham.a ke sar pe vo dhuāñ na rahā

sitāre dekh ke jalte haiñ āñkheñ malte haiñ
ik aadmī liye sham-e-fasāna aatā hai

shab ham ġhazal-sarā the 'ravish' bazm-e-nāz meñ
sham-e-adab-shanās ke lab par durūd thā

sham.a-rū ho ke faqat tum ne jalānā sīkhā
mere ġham meñ kabhī do ashk nikāle na ga.e

dil hai raushan ki hai dil meñ ruḳh-e-raushan un kā
zer-e-fānūs-e-badan sham.a hai joban un kā

jagah us sham.a-rū ne dī hai parvānoñ ke lashkar ko
sar-e-maidāñ chaman maiñ muskurā.e jis kā jī chāhe