Tags-Sharab

dil meñ bharā za-bas-ki ḳhayāl-e-sharāb thā
mānind aa.ine ke mire ghar meñ aab thā

ye kaisī bazm hai aur kaise us ke saaqī haiñ
sharāb haath meñ hai aur pilā nahīñ sakte

udaas raat hai koī to ḳhvāb de jaao
mire gilās meñ thoḌī sharāb de jaao

sāqiyā tishnagī kī taab nahīñ
zahr de de agar sharāb nahīñ

āñkhoñ se pī rahā huuñ tire pyaar kī sharāb
gar chhuT gayā hai haath se pyālā to kyā huā

usī amal kī zarā sī sharāb detā chal
sharar ke haath meñ koī gulāb detā chal

ham ne kisī kī yaad meñ akasr sharāb pī
pī kar ġhazal kahī to mukarrar sharāb pī

ab kaun jā ke sāhib-e-mimbar se ye kahe
kyuuñ ḳhuun pī rahā hai sitamgar sharāb pī

vaise to ham ne pī hī nahīñ thī kabhī sharāb
piine lage to vajd meñ aa kar sharāb pī

is cocktail kā to nasha hī kuchh aur hai
ġham ko ḳhushī ke saath milā kar sharāb pī

muddat ke ba.ad aaj maiñ office nahīñ gayā
ḳhud apne saath baiTh ke din bhar sharāb pī

yādoñ kā ik hujūm thā tanhā nahīñ thā maiñ
sāhil kī chāñdnī meñ samundar sharāb pī

sharāb-e-shauq ke sāġhar chhalak jaa.eñ to achchhā hai
fazā.eñ bāda-ḳhāne kī mahak jaa.eñ to achchhā hai

jām-o-sharāb-o-ḳhum subū sāqiyā haiñ barā.e-nām
nashsha tirī nazar kā hai mai-kada-e-hayāt meñ

tajdīd-e-ahd kar kisī sīmīñ badan ke saath
ya.anī luTā shabāb sharāb-e-kuhan ke saath

saaqī pilā sharāb zakāt-e-shabāb de
haañ phir koī mazāq dil-e-pur-mehan ke saath

ġhusl-e-tauba ke liye bhī nahīñ miltī hai sharāb
ab hameñ pyaas lagī hai to koī jaam nahīñ

mile na merī ġhazal meñ kyūñkar shu.ūr-e-hastī surūr-e-mastī
'jamīl' ke mai-kade se 'ehsāñ' sharāb-e-idrāk pā rahā huuñ

terī furqat meñ sharāb-e-aish kā toḌā huā
jām-e-mai dast-e-subū ke vāste phoḌā huā

ḳhayāl ik chashm-e-maigūñ kā sadā masrūr rakhtā hai
yahāñ kyā kaam hai saaqī sharāb-e-arġhavānī kā