Tags-Sharab

āb-e-hayāt ḳhizr-o-sikandar ko chāhiye
saaqī faqat sharāb ke haiñ ik piyā se ham

hujūm kyuuñ hai ziyāda sharāb-ḳhāne meñ
faqat ye baat ki pīr-e-muġhāñ hai mard-e-ḳhalīq

mai pī jo chāhe ātish-e-dozaḳh se tū najāt
jaltā nahīñ vo uzv jo tar ho sharāb meñ

pilānā paanī kā jaam zāhid gunāh mashrab meñ hai hamāre
savāb letā nahīñ hai kyuuñ tū sharāb mujh ko pilā pilā kar

ba-rañg-e-sāġhar milā diyā muñh jo muñh se tere ḳhafā na honā
kiyā hai behosh tū ne saaqī sharāb mujh ko pilā pilā kar

hosh meñ rah ke bhī hai be-hoshī
ziist apnī sharāb jaisī hai

baras paḌe jo gulistāñ meñ us nazar se sharāb
bahak bahak ke ham aage subu-e-lāla kareñ

sharāb-e-husn meñ mastī hai be-niyāzī kī
ḳhudī ke shīshe meñ Dhālūñ agar ijāzat ho

thā maiñ sharāb-dost bahut, merī ḳhaak ke
kaase banāne chāhiyeñ kuchh, kuchh subū kareñ

mast-e-sharāb-e-ishq vo be-ḳhud hai jis ko hashr
ai 'dard' chāhe laa.e ba-ḳhud par na lā sake

vo riñd-e-pāk-tabī.at hai aap kā 'shā.ir'
sharāb bhī na piye aur jhūmtā bhī rahe

terā jī chāhe to pilvā de koī jām-e-sharāb
haath phailāne kā banda nahīñ aadī saaqī

jo piyegā na sharāb aaj vo mujrim hogā
kū-ba-kū kal se tū kar de ye munādī saaqī

sāġhar to khanakte haiñ sharāb aa.e na aa.e
bādal to garajte haiñ ghaTā barse na barse

til hai tiryāk chashm jām-e-sharāb
sabza-e-ḳhat yū bañg hai yaaro

ḳharāb-e-nargis-e-mastānā āḳhir ho gayā zāhid
rasā hotī hai tāsīr-e-sharāb āhista āhista

zahr thā zindagī ke sāġhar meñ
rañg rañg-e-sharāb jaisā thā

pī jis qadar mile shab-e-mahtāb meñ sharāb
is balġhamī-mizāj ko garmī hī raas hai

na sirf teġh ki pī kar mire lahū kī sharāb
zamīn-e-dasht bhī mad.hosh hone vaalī thī

ġhazab thī bazm meñ saaqī kī tarz-e-mastāna
bharā huā na koī sāġhar-e-sharāb aayā