Tags-Sher

sher nāzim ne jab paḌhā merā
pahlā misra hī dūsrā niklā

shīrīni-e-hayāt aur talḳhī-e-tajrabāt
hoñ zikr tere sher meñ hijr-o-visāl ke

ye sher-o-shā.erī 'dā.em' ye ishq-o-āshiqī 'dā.em'
mirī maano tumhārī ye adā.eñ nā-munāsib haiñ

'sāz' jab khulā ham par sher koī 'ġhālib' kā
ham ne goyā bātin kā ik surāġh sā paayā

'faiz'-sāhib sher kyuuñ kahte nahīñ
'faiz'-sāhib sher kahnā chāhiye

sher-o-suḳhan kā shahr nahīñ ye shahr-e-izzat-dārāñ hai
tum to 'rasā' bad-nām hue kyuuñ auroñ ko bad-nām karūñ

shafīq sūraj ḳhamosh paanī magar abhī bhī kamī hai kuchh kuchh
'charāġh'-sāhab ke sher paḌh kar kareñ mukammal hamīñ udāsī

shabāb-o-sher-o-shāhid-o-sharāb se hī kaam hai
agar yahī hai shā.erī to shā.erī harām hai

zamīn-e-shor ho yā ho zamīn-e-sher ai dil
nahīñ hai koī ḳharīdār in zamīnoñ kā

ye tai huā hai ki sher o adab ke paimāne
hamāre shahr kā ik yak-fanā hī tai karegā

silk us kī nazm kā kyūñkar na hove qīmtī
'ābrū' kā sher jo dekhā so marvārīd hai

us ek sher pe āñkheñ chamak uThī us kī
vo sher jis meñ ki roTī kā zikr aayā thā

maiñ kahāñ aur kahāñ sher-o-suḳhan hai 'zākir'
koī tāqat hai jo lafzoñ ko jilā detī hai

daam meñ ham ko laate ho tum dil aTkā hai aur kahīñ
sher paḌhāne ham se aur mazmūn gaThā hai aur kahīñ

har sher ābgīna hai mauj-e-ḳhayāl kā
lo kaam ehtiyāt se jab shā.irī karo

gungunātā huuñ fursatoñ meñ 'nushūr'
sher tanhā.ī-zāda hotā hai

gesū-e-sher-o-adab ke pech suljhātā huuñ maiñ
zulmat-e-shab meñ payām-e-sub.h-e-nau laatā huuñ maiñ

har ik sher nahīñ ho saktā achchhā sher
shā.ir kuchh be-kār bhī bāteñ karte haiñ

har ahd ne zinda ġhazloñ ke kitne hī jahāñ ābād kiye
par tujh ko dekh ke sochtā huuñ ik sher abhī tak rahtā hai

radd-o-kad ke bhī ba.ad rah jaa.e
sher vo hai jo yaad rah jaa.e