Tags-Anjam

judā āġhāz se anjām se duur
mohabbat ik musalsal mājrā hai

vo betāb-e-tamāsha hī sahī ai tāb-e-nazzāra
laraz uThtā hai dil ye soch kar anjām kyā hogā

kyā hai anjām-e-mohabbat koī pūchhe ham se
jīte-jī ḳhaak meñ milne ke sivā kuchh bhī nahīñ

ayaañ afsurdagi-e-gul se hai anjām gulshan kā
magar ḳhūn-e-dil-e-bulbul hai sarf-e-āshiyāñ ab tak

dar pe hamāre jī ke huā ġhair ke liye
anjām-e-kār mudda.ī kā mudda.ā huā

kuchh qatra-e-mai uupar uupar phir dard hī dard andar andar
āġhāz-e-mohabbat ḳhuub magar anjām se bachnā mushkil hai

qissa-e-dard kuuñ anjām nahīñ misl-e-'sirāj'
ġham ke daftar kuuñ lapeT aah ke tūmār kuuñ khol

tū chāñd hai maiñ chāñd kā anjām-e-safar huuñ
āñkhoñ meñ tirī duur kahīñ Duub gayā huuñ

ḳhudā ba-ḳhair kare zabt-e-shauq kā anjām
naqāb merī nazar se uThā.ī jaatī hai

namāz-e-dīd ke anjām par mujhe dil kā
ye mashvara hai ki ab tauf-e-jalva-gāh karo

zard pattoñ pe mirā naam likhā hai us ne
sabz ḳhvāboñ kā ye anjām likhā hai us ne

āġhāz-e-ishq umr kā anjām ho gayā
nākāmiyoñ ke ġham meñ mirā kaam ho gayā

ḳhudā jaane kyā hogā anjām is kā
maiñ be-sabr itnā huuñ vo tund-ḳhū hai

ḳhudā ma.alūm le jaa.e kahāñ zauq-e-talab mujh ko
abhī to be-ḳhudī-e-shauq kā anjām hone do

pūchhā jo maiñ ne yaar se anjām-e-soz-e-ishq
shoḳhī se ik charāġh ko us ne bujhā diyā

to jab mere kiye par hai mirā anjām phir anjām
ye maazī haal mustaqbil to haiñ zer-e-nagīñ mere

thī yahī tamhīd mere mātamī anjām kī
phuul hañste haiñ to hotī hai pashīmānī mujhe

jaisī bhī guzartī hai ai 'rāz' guzartī hai
āġhāz-e-mohabbat hai anjām meñ kyā hogā

jis moḌ se chale the pahuñche haiñ phir vahīñ par
ik rā.egāñ safar ko anjām karte karte

hamārī kashtī-e-tauba kā ye huā anjām
bahār aate hī ġharq-e-sharāb ho ke rahī