Tags-Anjam

vo kyuuñ sar khapā.e tirī justujū meñ
jo anjām-e-fikr-e-rasā jāntā hai

tiflī ke girye kā ye khulā haal vaqt-e-marg
āġhāz hī meñ rote the anjām ke liye

āġhāz-e-mohabbat kā anjām bas itnā hai
jab dil meñ tamannā thī ab dil hī tamannā hai

ishq meñ maut se miltī hai hayāt-e-abadī
ishq kī maut to anjām bhī āġhāz bhī hai

āġhāz apne bas meñ na anjām hī 'adīl'
ik zindagī guzār ke marnā paḌā mujhe

shauq kā anjām niklā hasrat-e-āġhāz-e-shauq
raaz ban jaane se pahle raaz ifshā ho ga.e

samajh sakte ho kyā anjām hogā
tumhāre vaar se vo bach gayā to

mirī hayāt kā anjām aur kuchh hotā
jo aap kahte kabhī apnā jāñ-nisār mujhe

haa.e anjām is safīne kā
nāḳhudā ne jise Duboyā hai

anjām jo bhī ho mirā is razm-gāh meñ
mansūb tere naam se jashn-e-tarab to hai

raat ko din se milāne kī havas thī ham ko
kaam achchhā na thā anjām bhī achchhā na huā

gul nauha-kunāñ o sanam-e-dast-ba-sīna
allāh ġhanī! lamha-e-anjām hamārā

dil-e-nākām ko ulfat se terī kaam hai saaqī
mohabbat be-niyāz-e-ibrat-e-anjām hai saaqī

tirā mai-ḳhvār ḳhush-āġhāz-o-ḳhush-anjām hai saaqī
ki dil meñ yaad terī lab pe terā naam hai saaqī

jalva o dil meñ farq nahīñ jalve ko hī ab dil kahte haiñ
yaanī ishq kī hastī kā āġhāz to hai anjām nahīñ

anjām-e-safar kyā honā hai ye faisla mustaqbil degā
maidānoñ pe vahshat aaj bhī hai rāhoñ ke vo pech-o-ḳham na sahī

fikr āġhāz hī kī hai sab ko
koī anjām sochtā hī nahīñ

nazar bhī ab nahīñ uThtī hamārī samt mahfil meñ
'nadīm' īsār-o-ulfat kā yahī anjām hai shāyad

hai adam meñ ġhuncha mahv-e-ibrat-e-anjām-e-gul
yak-jahāñ zaanū ta.ammul dar-qafā-e-ḳhanda hai