Tags-Anjam

kaun uThā.e ishq ke anjām kī jānib nazar
kuchh asar baaqī haiñ ab tak hairat-e-āġhāz ke

phir ga.ī milne se pahle vo nazar ai 'kashfī'
ye vo anjām hai jis kā koī āġhāz nahīñ

allāh allāh kyā huā anjām-kār-e-ārzū
tauba tauba kis qadar hañgāma-ārā.ī huī

na kyuuñ anjām-e-ulfat dekh kar aañsū nikal aa.eñ
jahāñ ko lūTne vaale ḳhud apnā ghar luTā baiThe

vo afsāna jise anjām tak laanā na ho mumkin
use ik ḳhūb-sūrat moḌ de kar chhoḌnā achchhā

batā.ūñ maiñ tujhe anjām-e-ārzū kaise
banā rahā huuñ abhī zā.iche mohabbat ke

jo chāheñ ek palak Thahreñ ye so tāqat kyā
phirā kareñge ye āġhāz se le tā-anjām

dekhā hai ik nazar unheñ anjām jo bhī ho
qismat meñ apnī ai dil-e-nākām jo bhī ho

vo kahānī ki abhī sūiyāñ niklīñ bhī na thiiñ
fikr har shaḳhs ko shahzādī ke anjām kī thī

hamārī ibtidā miTTī meñ ik raaz
hamāre vāste anjām ubhre

hameñ kyā aap anjām-e-mohabbat se Darāte haiñ
hamāre ḳhuun se har daur kā āġhāz hotā hai

chāhtī huuñ ki karūñ us se mohabbat khul kar
lekin anjām na ho chāhne vāloñ jaisā

habāb-e-bahr kī sūrat ubharne kī zarūrat kyā
numūd-e-be-mahal kā jab burā anjām hotā hai

bhūle se koī naam vafā kā nahīñ letā
duniyā ko abhī yaad hai anjām hamārā

ham se pahle bhī mohabbat kā yahī anjām thā
qais bhī nāshād thā farhād bhī nākām thā

sitāre so ga.e añgḌā.ī le kar
ki afsāne kā anjām aa rahā thā

aa.ī jab stage par duniyā to dil ḳhush ho gayā
jab uThā anjām kā parda to nafrat ho ga.ī

gulshan hai isī kā naam agar hairāñ huuñ bayābāñ kyā hogā
hañgām-e-bahārāñ jab ye hai anjām-e-bahārāñ kyā hogā

bulbul kī fuġhāñ par ḳhanda-zanī ġhunchoñ ne jo kī pazhmurda hue
sach hai ki hazīn-o-ġham-zada ho hañsne kā ba-ḳhair anjām nahīñ

dil dete hī un ko ghulne lage nazroñ meñ ajal ke tulne lage
āġhāz-e-mohabbat se ye khulā chāhat kā ba-ḳhair anjām nahīñ