Tags-Anjam

anjām-e-kār bulbul dekhā ham apnī āñkhoñ
āvāra the chaman meñ do chaar TuuTe par se

ye shahr hai shahr-e-zardārī kyā hogā 'shamīm' anjām tirā
yaañ zehn ḳharīdā jaatā hai yaañ ahl-e-qalam bik jaate haiñ

jo muqaddar hai vo anjām-e-tamannā dekheñ
dil-e-vahshat-zada chal aaj use jā dekheñ

anjām pe apne āh-o-zārī kar tū
saḳhtī bhī jo ho to burd-bārī kar tū

'rāhī' rafāqatoñ kā ye anjām dekh kar
saa.e ke saath apnī shanāsā.ī kam huī

kuchh haare hue baiTh ke ab soch rahe haiñ
āġhāz kyā kam huā anjām ziyāda

jis kā kuchh anjām nahīñ vo jañg hai do naqqādoñ kī
lafzoñ kī saffāk sināneñ lahjoñ kī shamshīr nikāl

anjām-e-mohabbat se maiñ begāna nahīñ huuñ
dīvāna banā phirtā huuñ dīvāna nahīñ huuñ

ehtiyāt-e-jism kyā anjām ko socho 'anīs'
ḳhaak hone ko ye musht-e-ustuḳhvāñ paidā hue

anjām aarzū kā burā hai bas is liye
dil meñ kabhī charāġh ye jalne nahīñ diyā

maiñ jāntā huuñ anjām us kā
jis mārke meñ mullā hoñ ġhāzī

har sub.h kaTī har shaam kaTī bedād sahī uftād sahī
anjām-e-mohabbat jab ye hai is jins kā saudā kaun kare

kyuuñ sarf-e-nazar karte ho anjām se apne
qudrat to taraf-dār kisī kī nahīñ logo!

jo chal paḌe ho to anjām-e-gumrahī se Daro
supurd-e-ḳhāk na kar de ye rahguzār-e-havas

kyoñ na anjām-e-tamannā se sañvar jaa.e dil
ishq kī raah meñ kab ḳhūn-e-tamannā na huā

maiñ saarī umr ahd-e-vafā meñ lagā rahā
anjām kah rahā hai ḳhatā meñ lagā rahā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

muḳhtasar go hai dāstān mirī
us ke anjām meñ asar to hai

be-jale kis tarah bantā sham.a parvāne kā dil
vo use anjām kyā dete jo merā kaam thā

hosh kā zāmin thā saaqī kaif-parvar dil kā shauq
jaam thā paas aur be-andesha-e-anjām thā