Tags-Anjam

safar-e-ishq mubārak ho ki is meñ 'kausar'
ġham-e-āġhāz nahīñ ḳhatra-e-anjām nahīñ

anjām-e-ishq dekh liyā apnī aañkh se
ab to safī' dimāġh kā tere ḳhalal gayā

kyā ho anjām taraqqī kā ḳhudā jaane 'jalīl'
shorish-e-aql se larzāñ haiñ mah-o-aḳhtar tak

kisht-e-ummīd kartā sarsabz sabza-e-ḳhat
anjām-e-husn us kā āġhāz hai sarāpā

haa.e anjām kis gumāñ kā hai ye
shāḳh kuchh phuul phal ga.ī hogī

chale the do qadam jab bhī kabhī anjām rāhoñ par
hasīn-o-gul-fishāñ rāhoñ pe shaidā ho ga.e ham tum

vo na jā.eñge kabhī 'mahtāb' zulmat kī taraf
vaqt par anjām se vāqif agar ho jā.eñge

ek sho.ala havas kā bas meñ na thā āp-apne se haath dho baiThe
ḳhaak āġhāz ḳhaak hī anjām aag aisī lagī tamāshe meñ

duā to ḳhair duā se umīd-e-ḳhair bhī hai
ye mudda.ā hai to anjām-e-mudda.ā ma.alūm

zar, zamīñ, zor kā saudā jo samā.e sar meñ
rū-ba-rū naqsha-e-anjām-e-sikandar rakhnā

aish bhī guzre rañj bhī guzre dil kī hālat ek rahī
kab jashn-e-āġhāz manāyā kab ḳhauf-e-anjām kiyā

anjām-e-fasl-e-gul pe nazar thī vagarna kyuuñ
gulshan se aah bhar ke nasīm-e-sahar ga.ī

ye rū-e-raushan aur ye gesu-e-mushk-e-fām
yaañ shaam meñ to sub.h hai aur sub.h meñ hai shaam

bahut nihāl hai dil aañkh meñ hai sarmastī
lage ki shahar-e-ḳhush-anjām se guzar ga.ī huuñ

anjām āshkār hai mujh ġham-nasīb kā
lī hai panāh tere ġham-e-be-panāh kī

rañg laayā hai barā-e-dīda-e-anjām jo
sham.a har har zarra-e-ḳhāk-e-par-e-parvāna thā

kyā merā anjām yahī hai
kyā bas merā kaam yahī hai

anjām-e-ishq Thiik hī hogā janāb-e-shaiḳh
fursat se aa ga.e ho to fursat se baiThiye

hamāre sāmne har-vaqt anjām-e-shikāyat thī
kahī ko an-kahī kar dī sunī ko an-sunī ham ne

har sho.ala-gar-e-ahd-e-zulmat anjām se apne Dartā hai
jab zikr-e-sahar mahfil meñ chhiḌā kuchh sham.a kī lau tharrā hī ga.ī