Tags-Anjam

hairatī ho ke uThā.e hue dil phirte haiñ
is ke lag jaane kā anjām tumheñ kyā ma.alūm

jis ke anjām se TuuTe mirā pindār-e-anā
maiñ vo āġhāz dobāra nahīñ hone detā

qāfile vāloñ ko gumrāhī kā ehsās huā
kam se kam ab kisī anjām kā imkān to hai

ḳhizāñ kā naam anjām-e-bahārāñ kī ḳhabar sun kar
gulistāñ se kināra-kash huā hai bāġhbāñ shāyad

yuuñ zamāne meñ mirā jism bikhar jā.egā
mire anjām se har phuul nikhar jā.egā

kaaba o dair ke gumrāhoñ kā anjām hī kyā
yahī behtar hai unheñ dil kī taraf le chaliye

halāk-anjām takmīl-e-tamannā
baqā-e-ārzū hī zindagī hai

ik kalī bar sar-e-paikār ḳhizāoñ se hai
ye nahīñ vāqif-e-anjām yahī lagtā hai

mohabbat par udāsī chhā rahī hai
hai kyā anjām aur kyā ibtidā thī

talḳhi-e-anjām jab sab koshisheñ nākām hoñ
ḳhushnumā seboñ kī halkī turshiyāñ jab ḳhaam hoñ

shab ke rāj-dulāro socho apnā bhī anjām
shab kā kyā hai kaaT hī deñge jaise-taise log

har mulāqāt kā anjām judā.ī thā agar
phir ye hañgāma mulāqāt se pahle kyā thā

ishq ke phande se bachiye ai 'haqīr'-e-ḳhasta-dil
is kā hai āġhāz shīrīñ aur hai anjām talḳh

anjām-e-ishq maanā aksar burā huā hai
be-ishq zindagī kā anjām kyā huā hai

hūreñ nahīñ 'momin' ke nasīboñ meñ jo hoeñ
but-ḳhāne hī se kyuuñ ye bad-anjām nikaltā

yahī anjām thā ai fasl-e-ḳhizāñ
gul o bulbul kī shanāsā.ī kā

chand roza bahār par mat jā
gul kā anjām kyā huā kuchh soch

anjām-e-vafā bhī dekh liyā ab kis liye sar ḳham hotā hai
nāzuk hai mizāj-e-husn bahut sajde se bhī barham hotā hai

lagā hai dil ko ab anjām-kār kā khaTkā
bahār-e-gul se bhī ik pahlū-e-ḳhizāñ niklā

apnī tadbīr ke anjām se nā-vāqif hai
haal taqdīr kā auroñ ko batāne vaalā