Tags-Subah

dard-e-sar kho diyā sabīhoñ kā
sandal-e-sub.h kā hai taḳhta peT

sub.h-dam naqsh-e-pā un ke dhuñdlā ga.e
chāñd bar-jāda-e-kahkashāñ so gayā

nasīm-e-sub.h-e-bahār aa.e dil-e-hazīñ ko qarār aa.e
kalī kalī le ke muñh-añdhere sabāhat-e-rū-e-yār aa.e

kisī ḳhurshīd-rū ko jazb-e-dil ne aaj khīñchā hai
ki nūr-e-sub.h-e-sādiq hai ġhubār apne bayābāñ kā

mirā siina hai mashriq āftāb-e-dāġh-e-hijrāñ kā
tulū-e-sub.h-e-mahshar chaak hai mere garebāñ kā

sub.h hotī hī nahīñ aur nahīñ kaTtī raat
ruḳh pe khole vo kahīñ zulf-e-siyāh-fām na ho

baḌī dilchaspiyoñ se sub.h-e-shām-e-zindagī hogī
maiñ dekhūñgā unheñ aur saarī duniyā dekhtī hogī

vo sub.h sīna-e-sad-chāk meñ hai dāġh-e-junūñ
ki jis se dīda-e-ḳhurshed bhī do-chār na ho

ye ḳhvāb-e-sub.h kyā karte tamannā kī hinā-bandī
agar tārīḳh ne apne ko dohrāyā nahīñ hotā

dekhnā har sub.h tujh ruḳhsār kā
hai mutāla matla-e-anvār kā

chāñd taare ik diyā aur raat kā komal badan
sub.h-dam bikhre paḌe the chaar sū merī tarah

āḳhir jhalak uThī vo garebāñ ke chaak se
jis intizār-e-sub.h meñ guzrī thī merī shab

kyā jaane kab vo sub.h-e-bahārāñ ho jalva-gar
daur-e-ḳhizāñ meñ jis se bahalte rahe haiñ ham

vo sub.h ko aa.e to karūñ bātoñ meñ dopahar
aur chāhūñ ki din thoḌā sā Dhal jaa.e to achchhā

vo shām-o-sub.h sadqe ho jin par bahār-e-gul
chun chun ke saath laa.e haiñ rāteñ shabāb kī

umīd-e-sub.h-o-shām ġham ke darmiyāñ basar jo kī
to sā.atoñ ko dard meñ shumār kar liyā gayā

hai shab-e-vasl-e-do-ālam gesū
vo jabīñ sub.h-e-shahādat hogī

sub.h hotī hai to kunj-e-ḳhush-gumānī meñ kahīñ
pheñk dī jaatī hai shab bhar kī siyāhī bāñdh kar

sub.h-e-tāza hai muqaddar dil-e-māyūs Thahar
shajar-e-ummīd pe in.ām-e-samar lagtā hai

gesū-o-ruḳh ko jab se chāhā tab se merā rañg ye hai
shaam achchhā to sub.h burā aur sub.h achchhā to shaam burā